Vawiin chawhnu khan Govt Mizo High School-ah ‘Day of Govemiknights’ (Alumni Day) hman niin I&PR Minister Pu Lal Thanzara chu Khuallian a ni.

Khuallian Pu Lal Thanzara chuan Govt. Mizo High School atanga zirchhuak te intawhkhawmna hun ‘Day of Govemiknights’ hman a ni chu lawmawm a tih thu a sawi a. Kan sikul leh college chhuahna tan engnge kan tih theih tih ngaihtuah turin zirlaite chu a fuih a. Govt. Mizo High School hi Mizorama High School hmasa ber a nih angin hemi school atanga chhuak te hi ram leh hnam tana mi tangkai an lo ni tawh thin a ni tiin chutiang zawnga tan la turin zirlaite chu a chah a. Zirlai kan nih hunlai hi mihring nunah chuan a nawm ber lai leh pawimawh lai ber a ni a, vawiina in hun hman dan hian naktuk lama in awm dan tur a hril dawn a ni, a ti a. Zirna ngaih pawimawha nun uluk a pawimawh thu a tarlang a. Mizoram sawrkar hnuaiah chauh hna beisei lova central sawrkar hnuaiah hna hrang hrang bakah corporate hnate thawk turin in rilru in siam a ngai a ni, a ti a. Nu leh pate thawhchhuah sa rin reng hi thalaite tan thil zahthlak a ni a, chhungkua, ram leh hnam tan kawng hrang hranga mi tangkai, chhenfakawm leh nghahfak ni turin zirlaite chu a fuih bawk a.Cancer vei tam leh zuk leh hmuam ti nasa state kan ni a, hemi dona kawngah hian tan kan lak a ngai takzet a ni, a ti bawk.

Khuallian chuan kum 2018 HSLC pass tharte zinga Distinction a pass mi 46 hnenah lawmpuina certificate a sem nghal a. Govt Mizo High School Headmaster Pu Lalrammawia’n thusawina hun a nei a. Variety programme in a zui nghal a. He hunah hian school atanga lo zirchhuak tawhte, zirlai leh zirtirtute an tel a ni.