Mizoram sawrkar flagship programme New Land Use Policy (NLUP) hlawhtlinna hrang hrangte phochhuahna leh tarlanna hun NLUP Kutpui (Fair-cum- Exibition-2018) chu vawiin khan hlawhtling taka zawhfel a ni. Convention Center basement-ah kharna inkhawm neih niin Lunglei District Bawrhsap Dr Ankita Chakravarty, IAS chuan khuallian niin a hmanpui.

 Vawiin NLUP Kutpui kharna hun Lunglei Additional DC Pu Benjamin Lalzama kaihhruaiah hian Lunglei DC chuan NLUP Kutpui hlawhtling taka neih niin mipui thahnem takin an chhim chu lawmawm a tih thu tarlangin Lunglei District mipuite leh Department a thawktute chungah lawmthu a sawi a. NLUP Line department hrang hrangte hmalaknain Lunglei District chhungah hmasawnna  tam tak hmuhtheih in a awm mek a, NLUP tanpuina dawngtute tan an thil siamchhuah hralhna market siam sak kawngah sawrkarin hma a la chhunzawm zel dawn a ni, a ti bawk. NLUP tanpuina dawngtute hlawhtlinna a lawmpui thu tarlangin anmahni hmalakna theuhah thahnem ngai taka thawk chhunzawm zel turin a fuih bawk.

NLUP Kutpui kharna programme ah hian Lunglei District NLUP Kutpui Organizing Committee Secretary Pu Lalrochhara, District Fisheries Officer chuan report pein Pu Lalnundika, SDO (S) Lunglei chuan lawmthu sawina hun a hmang bawk.

NLUP Kutpui 2018 lawmman hrang hrang te pawh sem niin a hnuaia tarlan ang hian Stall ti tha ber pathum thlanchhuah ten Certificate leh Prize Money an dawng a ni.

1^st Prize (Best Stall) – Commerce and Industries Department – Certificate leh Rs. 20,000/-

2^nd Prize – Fisheries Department – Certificate leh Rs. 15,000/-

3^rd Prize – AH& Vety Department – Certificate leh Rs. 10,000/-

Hemi bakah hian Line Department te hnenah Participation Certificate hlan an ni.

Lunglei District NLUP Kutpui hian hlut a hlawhin tlawhtu pawh an thahnem hle a, Line Department stall te an inhralh tha hle a ni.

NLUP Kutpui ah hian Health and Family Welfare Department hmalaknain Free Clinic buatsaih a ni a, blood sugar test, Hb Test, Dengue Test, Malaria test, Bp check te a thlawnin neih a nih bakah mipuiten an hriselna kawnga thil hriattur pawimawh inziahna leaflet chi hrang hrang an sem chhuak bawk. Doctor rual pali ten he Free Clinic hi hovin mipuite rawn theih rengin NLUP Kutpui neih chhung hian an thu a. Mipuiten Free Clinic hi an hlut hle bawka, mi thahnem takin Free Test leh Free Consultation an nei a ni. Health Department hotute leh thawktute chungah Lunglei District NLUP Kutpui Organizing Committee chuan lawmthu an sawi a ni.