No.16/2021-2022

Aizawl, 4th April, 2021 : I&PR Minister Pu Lalruatkima'n nizan khan Mizoram pum huap infiamna Greenfield Futsal Cup, 2021 a kick-off.

Greenfield Futsal Cup, 2021 kick-off programme Dawrpui Multipurpose Hall-a buatsaihah khuallian niin Minister Pu Lalruatkima chuan mimal leh pawl thahnemngai te'n thalaite talent hai chhuak tura hma an la thin chu lawmawm a tih thu a sawi a, Futsal Association Mizoram hmalakna leh thahnemngaihna pawhin rah tha chhuahin North-East Futsal League Champion kan nei hial tawh a ni, a ti a. Mimal thahnemngai ten anmahni senso in Futsal khelhna hmun te siamin eizawnna tha tak a nih bakah thalaite infiamna leh hriselna kawngah hma nasa takin a sawn tir a. Mizoram sawrkar pawhin Aizawl khawpui hmun thenkhatah Futsal khelhna hmun siam a tum a, a department enkawl Rural Development department pawhin Aibawkah chhun leh zana Futsal khelh theihna tur siam tumin hma a la mek tih a sawi bawk.

Khuallian chuan Futsal hi infiamna upa tawh tak niin kum 1930 atanga khelh tan a ni a tia . Mizote khelh chi tak nia a hriat thu sawiin Greenfield Futsal Cup chu thalaite talent haichhuahna hun tangkai tak a nih ngei a beisei thu a sawi a ni. 

Thalai infiammite hmakhua Mizoram sawrkarin a ngaih pawimawh avangin Sports Policy mumal tak a duang tih sawiin Pu Lalruatkima chuan Olympic medal dawng thei Mizo thalaite chherchhuah hi an tum bulpui ber pakhat a ni, a ti a. Hlawhtling turin kawng a awlsam lova, insumtheihna, tumruhna, huaisenna leh beidawng lova tih fan fanna a pawimawh a ni, a ti a. Mifaten an tih theih chu kan ti thei ve a ni tih hria a, an hlawhtlinna chang tura an beih dan te entawna theihtawp chhuah turin thalaite a fuih a. Kohhran, khawtlang leh pawl anga thiltihnaah pawh thalai infiammi leh talent nei thate chu dimdawi deuh a, awl a pawimawh a ni tiin, reilotea Mizo hnam leh ram tihmingthatu an nih theih avangin anmahni chawkphur leh fuihtu ah mi zawng zawng kan tan a tul a ni a ti. Sawrkarin infiamna lama hma kan sawnna tura hma a laknaah mipuiten min tawiawm a ngai a, kan zavaia kan tanrual a ngai a ni, a ti bawk.

Khualzahawm Dr. Vanlaltanpuia, MLA, Mizoram Youth Commission Chairman pawhin thu sawiin kawng hrang hranga Mizo thalaite hmasawnna turin MYC chu a luangchhuak zel dawn a ni, a ti a. Mizote hi talent nei tha, Pathianin a hnam thlan bikte kan ni a, keimahnia theihna leh thiamna awm thangchhuahpuia hlawhtlinpui hi Pathian laka kan bat let pakhat a ni, a ti. Thalai infiammite chu hlawhtling tura theihtawp chhuah tur leh ruihhlo laka fihlim turin a chah bawk a ni.

Greenfield Futsal Cup, 2021 ah hian Team 64 awmin Group hnih ah Team 32 ve ve a then an ni a. April ni 6, 2021 atanga khelh tan niin, TBC Futsal Ground, Durtlangah Group match hi khelh a ni ang a. Group hnih-a a sang pali ve ve ten Quarter Final an lut ang a, Quarter Finals atanga Final hi Bethesda Futsal Ground, Tanhrilah khelh a ni ang.

Attachment

  • Loading attachment...