Khawhai Students' Union General Assembly Vawi 15 na Khawhai Town Hall-a neih chu vawiin khan I&PR Minister Pu Lalruatkima chuan khuallian niin a hmanpui a, he hunah hian Pu Laltanpuia, MCS, Joint Director, FCS&CA Department chu khualzahawm a ni.

Khuallian chuan Sawrkarin Zirlaite hmakhua ngaiin Sikul kal hun a ti danglam a, Zirtirtu indaihlohna phuhru turin Zirtirtu thahnem tak lak belh anih thu a sawi a. Sikul siam that leh thawmthat ngaite pawh a tul ang zela hmalak tum ani, a ti a. District thar piang vangin sawrkar inrelbawlna te pawh a tul anga zirchiana hmalak tum anih thu a tarlang a. Kan zavai hian Zirlai vek kan ni tiin, hriatbelh mamawh vek kan nih avangin Zirlaite chu hriatchinah duhtawk mai lova thlen chin atanga theihtawp chhuah turin a chah a. Sawrkarin khawvel thang zel milin zirna siamrem a tum a, hmanraw tha leh Zirlaite kalzelna turte a ngaihtuah zel dawn ani, a ti bawk. Hnam dinchhuah leh dam khawchhuahna turin zirna a pawimawh thu sawiin, Mizote India ram level examination pawimawh tak taka tling tlem ta lutuk a vei thu leh Zirlaite chu ngaihtuahna zau zawk pu turin a fuih a. Mizoram Sawrkar fawng chelhtu Officer lian tak takte hnam dang an ni nual tawha, tih takzeta beia zirbing duhte pawh chhiat that ni leh kohhran thiltihah te kan awlin kan phutlo ngam tur a ni, a ti bawk.

Zirlai kalkhawmte chu Social media hman chin tawk thiam tur leh Zirna hun tam zawk inpe thin turin a chah a. Ram leh hnam tana rotling leh innghahna tlak mi puitling ni thei tura tan la sauh sauh tura fuihin, Khawhai atanga miropui tak tak lo chhuak tawh thinte hnungzui ve thei tura taihmak chhuah thin turin a chah a. Khawhai Town Hall pawnlam bang siam thatna leh Sound system dah anih theihna tura hmalak pui a tum thu a sawi a. Mahni inlum kalsanin chona thar hmachhawn thei turin kan fehchhuak ngam ve tur a ni tiin, Zirlaite chu Nu leh pate chawimawia an thute awih fo turin a chah a. Hnam ropui leh hmasawn ni turin hmachhawp tam tak kan nei a, hmasawn zel tura hmalak hi kan mawhphurhna a ni, a ti a. Thalaite chu nakin lawka ram leh hnam innghahna tur an ni tih inhria a, nun kawng hrisel leh thianghlim zawh fo a, ruihhlo leh AIDS natna laka fimkhura inthiar fihlim turin a fuih a. Hmasawnna ruhrel thawh kawngah hlep tam aiin hnathawh that, hna tlo leh mawiah inel angai takzet thu tarlangin, nang leh kei lo chu he ram siamthatu tur an awm chuang lo a ni, a ti a. Zirlai hmabak eng tak tak neitute chu Khawhai khua mai bakah Mizoram chawimawia tihmingthatu nih tum theuh turin a chah nghal a ni.

Khualzahawm Pu Laltanpuia chuan Khawhai khawtlang inlungrualna leh faina kawnga hmasawnna fakin, faina chu thinlunga tuha nitina nunpui tur a ni, a ti a. Zirlaite chu Lehkhabu chhiar tam tura chahin, lehkhbu tha te ngaisangin chhiar tam intihhmuh angai ani, a ti a. Sawrkar pur kher lo a mahni kutkawih hmanga intodelh tum tur leh rim taka mahni thawhchhuah ngei mai seng tum tlat turin a chah a ni.

Vawiin Khawhai Students' Union General Assembly hi C.Lalremruata, Treasurer chuan a kaihruai a. Vanlalremsanga, Asst General Secretary-in inhmelhriattirna leh report a pe a. Pu K.Rodawla, VCP in thu a sawi a.
He hunah hian Kum 2019 chhunga Zirlai tithate chawimawina neih niin, hruaitu thar thlan ani bawk a. Rozamliana, Fin Secretary-in lawmthu sawiin hun a khar a ni.

Khawhai Students'Union hi kum 1983 a din niin, 'Zirna kaltlanga hmasawn' tih Chu an thuvawn a ni a. Vawiin General Assembly-ah hian Zirlaite, khawtlang hruaitu, NGO aiawh leh Zirtirtute an tel a ni.

Attachment

  • Loading attachment...