3872/2022-2023
Aizawl, the 16th March,2023: Vawiin khan Pi Lalhmingmawii Rawihte lehkhabu ziah ‘Kan fate tan’ tih chu Information & Public Relations Minister Pu Lalruatkima chuan Aizawl Press Club-ah a tlangzarh.

Tlangzarhna inkhawmah hian Pu Lalruatkima chuan vawiiina lehkhabu tlangzarh tak chu nu leh pa leh naupangte tan lehkhabu tangkai tak anih a beisei thu a sawi a. Mizo pi leh pute sulhnuah entawntlak leh thawnthu buatsaihna tham tling tam tak a awm a, hei hian Mizo literature a tihausain, a tihlu zual hle a ni, a ti. Mizo ziakmi ten an hun tawn mil zela thiam taka thu an ziak thin chu hlu a tih thu Minister chuan sawiin, thangtharte tan zirlai tha tak hnutchhiah a, ziaka thil chhinchhiah uar sauh sauh zel turin ziakmite chu a fuih bawk a ni.

Minister chuan Mizo nunphung hrang hrangte chu khawvel thiamna sang zelin a thlak danglam mek thu a sawi a. Chhungkaw inhmangaihna, induhsakna leh inpumkhatna te a lo parvul leh theihnan chhungkuaah inzirtirna tha a awm a ngai a ni, a ti a. Mizoram chu a la chhiat vek loh thu sawiin, mite thatna hmuhsak a, fuihphur leh dawmkangtu ni theuh turin kalkhawmte chu a sawm a ni.

Lehkhabu tlangzarh inkhawm hi Pu Hmingchungnunga chuan a kaihruai a, Pu K.Remruatfela chuan lehkhabu thlirlawkna hun neiin, lehkhabu ziaktu Pi Lalhmingmawii Rawihte in thu a sawi bawk.