Vawiin khan Information & Public Relations Department buatsaihin Lianchhiari Run, Multi Facility Centre sakna tur hmun, Directorate Office building thiah lai mek, Treasury Square-ah I&PR Minister Pu Lal Thanzara’n lungphum a phum. 

I&PR Minister chuan Lianchhiari Run, Multi Facility Centre changtlung tak, Information & Public Relations Department hmalakna-a sak theih tura hmachhawp a lo puitling tan ta hi Mizoram tan thil ropui tak a ni, a ti. Lianchhiari Run chu sawrkar leh mipui tana chhawr nahawm, thalai tam tak, vawiina lehkha thiam te, zirlai la ni mek ten finna leh hriatna an chhar chhuahna hmun, a nih a beisei thu Pu Lal Thanzara chuan a sawi a.  Vehicle Parking te, Film chhuah theihna tur Theatre te, Conference Hall te, Art Gallery leh Studio te awm tura ruahman a nih thu sawiin ram changkang zawk ten an neih ang building pakhata thil tam tak tih theihna hmun, Lianchhiari Run sak zawh a nih hunah chuan Mizo thalai talent nei tha tak takte kutchhuak phochhuahna hmun tha kan nei tawh dawn a ni, a ti.

I&PR Director lo nih tawh thin Pu Denghnuna, IAS (Rtd.) leh Pi Lalnithangi, MIS (Rtd.) te pawhin he hunah hian thu sawiin I&PR Department to bul leh hnathawh dan te, Lianchhiari Run sakna tura ruahmanna siam tan a nih dan a bul thum atanga sawiin he building thar sak tura ruahman mek hi Mizoram sawrkar leh Mizo mipui tana tangkai a nih ngei an beisei thu an sawi a ni.

Lianchhiari Run hi North Eastern Council (NEC) sum hmanga sak tur ni in project pumpui sak zawhna atana ruahman chu cheng vaibelchhe 10 a ni a. April, 2017 khan a sakna tur sum thawhkhatna cheng vaibelchhe khat chu NEC hian a pe tawh a, Mizoram sawrkarin a do letna tur cheng nuai 11.11 pawh Finance in a remtihpui  tawh a ni. He building hian chhawng 7 a nei ang a, lift pawh hmun hniha dah tum a ni. A chhungah hian mi 95 thut theihna tur Lecture Hall, mi 200 thut theihna tur Conference Hall, Exhibition Hall, Art Gallery, Mini Theatre leh lirthei engemawzat park theihna tur hmun a awm dawn a ni.

Programme hi I&PR Secretary Pu Biaktluanga, IAS chuan a kaihruai a, I&PR Director Pu David L.Thangliana’n lawmthu sawina hun a hmang a. I&PR department-a thawk mek leh lo thawk tawh thin mi engemawzat bakah Planning, Finance, Aizawl SP Office atangte leh Mizoram Journalists Association, Mizoram Photographers Society, Mizoram Art Development Society leh Mizoram Film Forum aiawhte pawh he hunah hian an tel a ni.