3848/2023-2024

Aizawl, the 16th February, 2024: Information & Public Relations (I&PR) Minister Dr. Vanlalthlana chuan vawiin chawhma dar 11:00 khan Mizoram Information Service Association (MISA) Annual Conference 2024 chu I&PR Auditorium, Treasury Square-ah khuallian niin a hmanpui a, I&PR Secretary Pi Teresy Vanlalhruaii chu khualzahawm a ni.

Khuallian I&PR Minister Dr. Vanlalthlana chuan I&PR Department chu department pawimawh tak, mipuite hriat tur information pek chhuah mai bakah inlaichinna tha public relations kengkawhtu a nih tel thu sawiin, thawktute chu sawrkar, mipui leh media-te inkarah inlaichinna tha zawk a awm theih nan public relations nihna vawngnung zel turin a chah a. Heng bakah hian sawkar laipui leh corporate-te nena inlaichinna tha zawk a awm theih nana Relationship Manager siam kawngah ngaihtuahna sen tlan a tul thu a sawi bawk a. Thawktu indaihlohna avanga harsatna tawhte sutkian a nih theih nan hmalak chhoh mek zel a nih thu sawiin, ram leh mipui rawngbawl kawngah infinchhuah tawn zel a tul thu a sawi bawk.

I&PR Minister chuan mipuite hriat tur pawimawh sawrkar thu leh hla, scheme leh hamthatna awmte zau zawka puanzar kawngah media platform hrang hrangte tangkai lehzuala hman a tul thu sawiin, MIS Officer-te chu tunlai thiamna chhuak thar leh tangkai tak takte chiang zawka hmelhriata hman tangkai zel tum turin a chah a. Allocation of Business-a lang Department hmalakna tur 15 te tha taka kalpui a nih theih nan tanlak tlan a pawimawh thu sawiin, Sawrkarin a ngaihpawimawh em em Sustainable Development Reform Policy (SDRP) leh Sawrkar policy-te ngaihven tlang tur leh mipuite'n an tangkaipui theih nan zau zawka puanzar kawngah ngaihtuahna seng zel turin a chah bawk.

Khualzahawm Pi Teresy Vanlalhruaii chuan I&PR Secretary nihna a chelh hnu hun reiloteah Officer-te nena hmaichhana inhmelhriatna leh inkawmhona hun remchang buatsaih a ni chu vanneihthlak a tih thu sawiin, MISA member-te chu mipui rawngbawl an ni tih inhriaa mahni hna theuhte rinawm taka thawk turin a fuih a. Sawrkar hnathawkte chu ram thatna tura hmanraw pawimawh tak an nih thu leh roreltute tha tichaka an kutke pawimawh tak an nih thu sawiin, Sawrkar hnathawkte phuartu leh an zawm tur Dan pawimawh tak Conduct Rules ngaipawimawh theuh turin a chah a. I&PR hmalakna hrang hrangte chu hun bi nei leh a hun taka zawhfel ngaite a nih tlangpui thu sawiin, thawktute chu Office hun chhung bakah a tul hun apianga che chhuak thin an ni tih inhriaa, inpekna nena thawk chhunzawm zel turin a fuih nghal bawk.

MISA Annual Conference 2024 hawnna hun hi MISA Secretary Pu Andrew H. Lalremruata chuan kaihruaiin inlawmna thu a sawi a. Pi Lalnunmawii, MISA Treasurer-in hunserh hmangin Gen Secretary Pu Malsawmsanga hnen atangin report ngaihthlak a ni a. MISA President Pu F. Lalfakzuala leh MISA Patron & I&PR Director Pu C. Lalnunkima te hnen atangin thusawi ngaihthlak a ni a. MIS Officer tharte inhmelhriattirna hun hman a ni bawk.

Chawhnuah MISA rorel inkhawm neih niin, kum 2024-2026 chhunga pawl hruaitu turte thlan a ni bawk.

Tun dinhmunah MIS Cadre Sanctioned Post 36 ah MIS lak thar 5 te chhiar telin Post 25 (69.44%) hnawhkhah a ni.