Information & Public Relations Department leh Mizo Hmeichhe Insuihkhawm Pawl General Headquarters tangkawpin “Ram leh Hnam Hmasawn nan Hmeichhia te Pawimawhna” tih thupui hmanga vawiin a Vanapa Hall-a Mizo Women Media Festival an buatsaihah I&PR Minister Pu Lal Thanzara chu khuallian niin hun a hmanpui a. MHIP Patron Pi Lal Riliani chu Khualzahawm a ni.

Minister chuan thupui pawimawh leh awm tak thlangchhuak a hmeichhiate pawimawhna leh mawhphurhna ropui tak tichiang tura I&PR Department leh MHIP General Hqrs. ten ruahmanna an siam chu lawmawm a tih thu a sawi a. Tun hma huna khawtlang leh chhungkhuaah hmeichhiate dinhmun hniam hle thin mahse tun hunah erawh kan rilru put hmang te lo changkangin, kawng hrang hrangah hmeichhiate dinhmun a tha tawh viau a, Ram leh Hnam hmasawnna atan tangkaina nasa tak an nei tawh a ni, a ti a. Eng hmasawnna mai pawh hi a hnukpui ber chu lehkha thiam, zir sanna leh hriat zaunaah hian a innghat phawt a, chumi atan chuan Mizo hmeichhiate lehkha thiamna lamah hian, mipaten hmeichhe hnung hi kan um ta zawk mah emaw tih theihin kan awm mek a ni, a ti a. Hei hian a ken tel nghal tlat chu Sorkar hna emaw, lehkhathiamte thawh chi hna hrang hranga dai luh ve nghal a ni a, mipa ang bawkin Sorkar hna ani emaw, private firm a ni emaw, kuthnathawh lamah thleng pawhin hmeichhia ten mipa tih theih ang tam tak ti ve theiin, an duai bik lova. Hei hian hmeichhiate hi Ram leh Hnam hmasawn nan an pawimawhna chu a takin chiang a tarlang a ni, a ni.

Sorkar pawhin hmeichhiate dinhmun chawikang turin leh, an dikna te hum sak a nih theih nan nasa tak hma a lak thu Minister chuan a sawi a. Ram leh Hnam hmasawnnaah pawh an pawimawhna ti lang thei turin - Village Council level-ahte, Local Council leh Aizawl Municipal Corporation-ah te reserve seat siam sak annih thu a tarlang a. Khua leh veng thenkhata heng seat chuh tur hmeichhia kan inhmu zo lo lek lek thin erawh kha chu tan kan lak tlan na tur ni se, tiin Minister chuan mithiamten khawvel hmun hrang hrang an zir chianna atangin hotute zingah mipa chauh ni lovin mipa leh hmeichhia an awm pawlh hian pawl a chak zawk thin tih an hmuhchhuah thu a tarlang a. Keini Mizo te ai pawha hmeichhe dahhniam a kan ngaihte zingah pawh hmeichhe Chief Minister sawi tur an awm zawk tlat ni, a ti bawk.

Minister Pu Lal Thanzara chuan Sorkar hmalakna leh order chhuah hrang hrang leh transfer and posting chungchang sawi telin, sawrkar chuan post tinah hna thawktu tur mi thiam leh tha te dah vek a duh a, amaherawhchu indaih lohna avangin post zawng zawngah a dah vek thei lova, mipuite pawh hei hi hrethiam turin a ngen a ni.

Khualzahawm Pi Lal Riliani pawhin thu sawiin, hmeichhiate hi tuarchhel tak tura siam kan ni a, ram leh hman hmasawnna atan mawhphurhna thuk tak kan nei a ni, a ti. Hmeichhiate chu chhungkhurah ei leh bar, silh leh fen ngaihtuah kawnga khaidingtu an nih thu a tarlang a. Hmanlai huna dinhmun hnuaihnung zawk ah an din lai pawh khan mawhphurhna tam tak an lo neih tawh thu sawiin, tun huna hmeichhiate dinhmun a lo zia tak hnu hian kan pawimawhna a sang zel a. Thil hrang hrangah mipa tluk zetin thiamna leh theihna kan nei a, chutih rual chuan engkim a inrawlh leh tih tum vek a tul kherlo a ni, tiin MHIP Patron chuan a sawi a. Chhungkaw enkawl chungchangah hmeichhiaten an mawhphurhna an hai tur anilo a, chhungkaw sum lakluh mila khawsak dan thiam loh chuan pasalte eiru turin emaw thil diklo ti tura nawrtu kan lo ni zawk palh hlauh thei a ni, a ti.

Mizo Women Media Festival hawnna inkhawm hi Pu Jim K. Chozah, I&PR Department Director chuan a kaihruai a. He Festival hi buatsaih a nih chhoh dan tarlangin, kumin kumtir lama YMA nen tanghova I&PR Department in “Khawtlang Nun Siamthat Workshop” a lo buatsaih chu hlawkthlak leh neih chhunzawm tlak nia a hriat avangin tun tumah hian hmeichhiate lamhawi hun buatsaih a nih tak thu a sawi. Festival hawnna hun inkhawmah hian MHIP General Headquarters President Pi Lalthlamuani hnen atangin thusawi ngaihthlak a ni bawk.

Vawiin hunah hian chawhnu lamah mithiam sawm te hnen atangin paper presentation leh zirhona neih chhunzawm a ni a. “Central Schemes hrang hranga hmeichhia te hamthatna inhrilhhriatna leh zirtirna leh ngaih pawimawh dangte” tih thupui hmangin Dr. C. Vanlalramsanga, IES, Planning & Programme Implementation Department Secretary atangin presentation ngaihthlak a ni a; MHIP Vice President Dr. Thanpuiin “Mizo Hmeichhia te – Hnam ro, Fanau Enkawl, Zirna, Hriselna leh Kut themthiamna lamah: tih thupui hmangin thu a sawi bakah Lengzem Editor Pu Vanneihthluanga hnen atangin “Mizo Hmeichhia – Hnam intodelhna atan” tih ngaihthlak a ni bawk.