Vawiin khan School Education Minister Pu H.Rohluna chuan District 8 aiawh te inelna, state pumpui huap 34th Mizoram Secondary School Games, 2016 kharna hun Rajiv Gandhi Stadium ah hmanpuiin intihsiakna a titha te hnenah lawmman a sem. Kumin Secondary School Games tiak taah hian Gold Medal 17, Silver Medal 8 leh Bronze Medal 10 hlawhchhuaktu, Aizawl District team chuan pakhatna hauh in Champion nomawi an chawi a ni.

Mizoram Secondary School Games, 2016 kharna huna thusawitu School Education Minister Pu H.Rohluna chuan sikul naupang ten thluak tha leh ngaituahna hrisel an neih theihnan taksa hrisel an mamawh a, taksa hriselna kawnga sikul naupang te chawhphurna turin sawrkar in school games te a huaihawt thin tih a sawi a. School Education Minister chuan zirna kawng bakah infiamna khawvelah thleng pawhin sikul naupang leh thalai te tan hlawhtlin theihna kawng a inhawn zau thu sawiin a peih leh tumruh te tan phei chuan khawvel pum huapa mihlawhtling nih a har tawh lo a ti.Ruihlo chu thalaite bakah ram leh hnam hmelma tih a sawi a. Ruihlo chu tihchhin hauh loh tur thil leh vawikhat tihchhinna chu thihna kawngzawh ang leh ruihloa saltanna piah lamah damchhunga nunkhaw chawrchhuah tawhlohna a ni tih sawiin zirlaite chu ruihlo laka fimkhur turin a chah.

34th Mizoram Secondary School Games, 2016 kharna hun hi Organising Committee Chairman Pu S.T. Zaduna, Jt. Director of school Education in a kaihruaia; Pi C.Lalmalsawmi, Secretary, Organising Committee, 34th Mizoram Secondary School Games hnen atang report ngaihthlak a ni thung. Kum in Secondary School Games ah hian Kala Utsav, 2016 pawh telh nghal a ni a. Kala Utsav ah hian inelna 4: Dance, Music, Visual art leh theatre te a awm a. Dance ah Champhai District in lawmman la in inelna dang 3 ah hian Aizawl District in lawmman an la fai vek thung. He School Games leh Kala Utsav ah hian district 8 aiawh sikul naupang 906 leh zirtirtu 76 an tel a, sikul naupang zinga 330 hi hmeichhia an ni. Inelna chi 7 : Athletics, football, badminton, basketball, table tennis, taekwondo leh volleyball ah te neih niin Rajiv Gandhi Stadium ah Athletics leh Football, Bethlehem YMA Hall ah Badminton, ITI YMA Hall ah Table tennis leh volleyball te khelh niin Hawla Stadium ah Basketball leh taekwondo khelh a ni. A pumpuia inelna ah hian pakhatna : Aizawl District, Pahnihna: Kolasib leh Pathumna: Champhai te an ni a. He School Games ah hian Gold medal 41, silver medal 41 leh bronze medal 51 - avaiin medal 133 semchhuah a ni. Vawiin a 34th Mizoram Secondary School Games kharna hunah hian National School Games, Warrangal, Telangana State a neih taka Mizoram aiawh a rit inchawisiaka ti tha 2 - Silver medal dawngtu Vanlalrimawii leh Bronze Medal dawngtu Lalkrosmawia te hnenah School Education Minister Pu H.Rohluna chuan lawmman a hlan a ni.

Attachment

  • Loading attachment...