Mizoram chhunga Journalist 130 te hnenah vawiin khan sem a ni a, I&PR Minister Pu Lal Thanzara chuan I&PR Auditorium-ah Press Accreditation card hi sem in, he programme-ah hian India ram chhunga working journalist zinga upa ber Pu Lalbiakthanga Pachuau, Kum 90 hnenah chawimawina hlan a ni bawk.

I&PR Minister chuan accredited journalist-te chu a lawmpui thu sawiin, an thuziak leh kamchhuak ah te pawh accredited journalist an nihna lang zel se, a ti a. Thu belhchian dawl leh innghahna tlak an lakah mipuiin an beisei thin a ni tiin, democracy rama cheng kan nih angin editorial pawh tan lam leh political party awn lam nei lova, sawisel tur a awm pawha huaisen taka thu lai la chunga sawisel ngam tura beisei an nih thu a sawi a, Midang an dawrna leh an inthuamna chenin an zahawmna lang se, Chanchinbu leh TV news a thu leh milem tarlante, social media-a an thil post ah te fimkhur a, tih lan tur awm leh awmlo thliar thiam a, midang tan entawn tlak ni zel turin a chah a ni.

Minister Pu Lal Thanzara chuan journalist-te chu Sorkarin mipui rawng an bawlsak kawnga a thawhpui tangkai tak an nih thu sawiin, hmalakna hrang hrangte zau zawka mipui hriatthiam tura an thehdarhna chu lawmawm tiin, thawhpui zelah a sawm a. Hmasawnna kawng zawh zel tura a duhsak thu sawi telin, thiamna tipung tura training te pawh nei thin turin a chah a. A rem chan leh theih ang zela an chanvo te tiphuisui tura Sorkarin hma a lakpui tur thu a tarlang bawk.

Vawiin programme-ah hian khuallian I&PR Minister hian India rama thuthar thehdarh kawnga hnathawk, Working Journalist upa ber Pu Lalbiakthanga Pachuau, Prominent Press Representative chanchin Short Documentary siam chu ‘youtube’-ah upload sakin, Mizoram Sawrkar hnuaia Mizoram Press Accreditation Committee ten chawimawina certificate an siam chu a hlan bawk a, Mizoram Journalist Association pawhin chawimawina thuziak an hlan bawka ni. Pu Lalbiakthanga Pachuau hi kum 1953 atang khan vawiin thlengin jounalist hna thawk in, Mizoram Journalist Association President tum thum a lo ni tawh a ni.

Press Accreditation card semna hun hi I&PR Secretary Pu B.Lalthanliana, Mizoram Press Accreditation Committee Chairman ni bawk chuan kaihruaiin. I&PR Department Joint Director Pi Lalnithangi hnen atangin Press Accreditation buaipui a nih chhoh dan tlangpui ngaihthlak a ni a. Pu Lalbiakthanga Pachuau, Prominent Press Representative chuan thu a sawi a, MJA President Pu Vanlalrema Vantawl chuan lawmthu sawiin hun a khar a ni.

Mizoram Press Representatives Accreditation Rules siamthat anih hnuah District hrang hranga Accredited Journalist awm zat chu - Aizawl District atangin mi 54 an awm a, Lunglei District atangin mi 20, Siaha District atangin mi 11, Champhai District atangin mi 10, Kolasib District atangin mi 11, Serchhip District atangin mi 11, Lawngtlai District atangin mi 5, leh Mamit District atangin mi 8 an awm a ni.

Mizoram Press Accreditation Rules in a phal angin thu thar thehdarh kawnga thawh hlawk kum 65 aia upa te hnenah Prominent Press Representative nihna mi 5 hnenah hlan an lo ni tawh bawk.