Vawiin khan Mizoram Journalists’ Association (MJA) General Conference vawi 43-na chu Berawtlanga Art & Culture Auditorium-ah neih a ni a. MJA General Conference-ah hian Information & Public Relation Minsiter Pu Lal Thanzara chu khuallian niin Disaster Management & Rehabilitation Minister Pu C. Ngunlianchunga chu khualzahawm a ni.

Khuallian, I&PR Minister Pu Lal Thanzara chuan MJA member-te chu sawrkar neitu thinlung pu tur a sawmin, “Kawng engkimah a tha zawnga mipuite zirtirtu in ni thei a, a chhe zawnga hruai sual theitu in ni thei bawk tih hi lian takin in rilruah awm reng se ka duh a ni,” ti a, mipuitetan zirtirtu leh kaihruaitu tha nih tum tlat turin MJA member-te chu a sawm a ni. Mizoramin hun reilote chhungin nasa takin hma a sawn tih pawnlama miten min hriatpui tih sawiin Minister chuan chanchinbumite chu Mizoram chanchin a tha lam puang uar turin a sawm a, “THUDIK puan chhuah hi in hna anih avangin in ‘Source’ check uluk hle turin ka ngen bawk che u,” a ti bawk. Chanchinbumite chu mimal hming, khua, lui, tlang leh hmun hmingte a ziahdan dik leh lam rik dan dik ngai pawimawh tur leh Mizotawng dik hmang uar turin khuallian chuan a chah bawk.

Khualzahawm, DM&R Minister Pu C. Ngunlianchunga pawhin Chanchinbumite chu ram hmel tilangtu, sawrkar kal diklo palh tur venpuitu leh sawrkar hmalakna puangzartu an nih avangin sawrkar nen inpawh taka thawhho tul a tih thu a sawi a. Chanchinbumite Investigative journalism uar turte, thu belhchian dawl chauh chhuah tur leh ramhruaitu leh mi pawimawhte hming ziak kawnga fimkhur lehzual turin a fuih bawk. Huaisen taka thudik mipuite hriattir chu Chanchinbumite mawhphurhna a nih thu sawiin khualzahawm chuan chanchinbumite chu thudik tana huaisen taka an din theih nan mahni intodelh kawnga tanla turin a sawm bawk.

MJA General Conference hi an pawl Vice President Pu Zonunsanga Khiangte-in a kaihruai a. Kum kalta chhunga MJA member boralte sunna hun hman a ni bawk. MJA President Pu Vanlalrema Vantawl pawhin thu sawiin MJA member-te chu MJA General Conference, an pawl Rising Day ni bawk puala inlungrual taka hmasawn tum theuh turin a sawm a. Advertisement chu sawrkar hmalakna leh proggramme puanzarna pawimawh tak a nih avangin Budget-a Advertising & Publicity atana sum dah tam deuh deuh tur leh Advertisement Bill rei tak tak tang thin avanga an harsatnate sutkianpui turin Minister-te a ngen bawk. Chawhnu lamah hian Hruaitu thlanna leh Rorel nan hun hman niin tlaiah zanriah an kilho nghal a ni.

MJA hi kum 1972-a din niin tunah hian Mizorama district zawng zawngah din a ni tawh a. Tun dinhmunah hian MJA member 204 an awm mek a.