Vawiin khan Champhai DC Pu Vanlalngaihsaka hovin UD&PA hnuaia vengchhung hrang hranga bawlhhlawh khawnkhawm leh paih dan chungchang sawiin khawtlang hruaitute leh tlawmngai pawl aiawhte DC Conference Hall-ah an thukhawm. DC chuan mahni vengchhung theuh vawn fai leh thianghlim kawngah thahnemngai tlangin, veng thnekhatah phei chuan Department motor paih kal thin bakah motor hire thin a ni te chu lawmawm a tih thu a sawi a. Bawlhhlawh paih lirthei hire chungchangah pawh fimkhur a tul thu sawiin, a paihna tur hmun siamah ngei an paih em tih pawh thlithlai zui thin turin khawtlang hruaitute chu a chah a. Paihna tur hmun ni lova bawlhhlawh paih hian khawchhung a titawpin boruak a ti hriselloh phah thin avangin paihna tur hmun siamah chauh paih thin turin vengchhung mipuite pawh inzirtir that a pawimawh thu DC chuan a tarlang a ni.

Vawiin meeting-ah hian DUDO Pu V. Lalmuanpuii pawhin thu sawiin, Champhai dumping ground chu a hlat deuh avangin Zotlangah Mini-Dumping ground siam tumin hmalak mek a nih thu a tarlang a. Faina leh thianghlimna kawnga hmasawn turin Sorkar hmalakna ringawta innghat lo va, kan hriselna atana pawha thil tangkai tak a ni tih hriaa mitinin mahni kan insenso ngam ve angai ani tih hi kan inzirtir thar a tul hle a ti bawk. VC leh YMA hruaitu kalkhawmte chu bawlhhlawh paihna hmun siam bikah chauh paih a nih theih nan mahni huamchhungah theuhah khauh zawka hmala turin thawhpuiah a sawm bawk.

Vawiin meeting-ah hian Champhai Town Area huamchhunga VC leh YMA ten faina leh thianghlimna kawnga hmasawn dan tur chi hrang hrang sawiho niin, kalpui zel dan tur te sawiho a ni a. Veng hrang hrang VC ten an vengchhunga bawlhhlawh paih an kalpui dan leh hmalakna te an report bawk a. Hmun thenkhatah chuan PPP mode-a kalpui niin, MGNREGA nen suikhawma hmalak a ni bawk a ni.