3338/2022-2023

Aizawl, 24th January, 2023 : I&PR Minister Pu Lalruatkima chuan vawiin khan a Pisa MINECO ah MJA member te chu a office ah lengah sawmin thingpui a inpui a. He hunah hian MJA General Headquarters President Pu C Lalrambuatsaiha leh MJA member te bakah I & PR hotute an tel a. Ram rawngbawlna atana tan lak tlanna tur te inpawh takin an sawiho a ni.

Pu Lalruatkima chuan MJA leh thu thar thehdarhtuten Sawrkar an tawiawmnaah leh thawhhonaah lawmthu a sawi a. Mipui thlan tlin Sawrkar chu sawisel ngam loh a nih a rem lova, Sawrkar tan inenletna tak tak a ni thei, tih Minister chuan a sawi a. Amaherawhchu, sawiselna hi dengkhawng tak tak ni lovin sawrkar insiamthatna tur atana constructive criticism ni zawk se, insiamthatna tura insawiselna hi mi tute pawhin kan tangkaipui a ni, a ti. Hemi kawngah hian chanchinbu Editor te kamchhuak Editorial chu hmanraw pawimawh tak a nih thu a sawi bawk.

Mizo tawng hman leh ziah dik chungchangah chanchinbu mite chu Mizo tawng humhalhtu leh thehlartu pawimawh tak an nih thu Minister chuan a sawi a, tunlaia thuthar thehdarhna kawnga thiamna thar te hmang tangkai turin a fuih a ni. Social media kaltlanga thu belhchian dawl lo leh thu dik lo vawrh lar a nasat thu sawiin thuthar thehdarhtute chu mipui te zirtir kawngah theihtawp chhuahpui turin a sawm a ni.

Pu Lalruatkima chuan Department hmalakna leh hmachhawp thenkhatte sawiin Journalist Pension Scheme tihpuitlin a nih theih nan theihtawp chhuah a umzui zel mek a ni a ti a. Thuthar thehdarhtute tan Study Tour leh Field Visit buatsaih thin hripui vanga kum 2 chuang chawlhsan tawh chu kumina ruahmanna siam leh tum a nih thu a tarlang bawk.

Minister Pu Lalruatkima chuan MJA hmalakna hrang hrangte puangzara a bik takin Covid hripui dona kawnga sawrkar an tawiawmnaah I&PR Department changtu Minister a nih angin lawmthu a sawi a. MJA te hamthatna atana Mizoram sawrkarin a theih anga anga kawng a dapsak dan te tarlangin Press Enclave leh thil thenkhatah erawh beisei anga hlawhtlinna a la awm thei lo erawh chu pawi a tih thu a sawi a. I&PR Department leh a department enkawl dang, Rural Development leh Land Revenue & Settlement te nena Mizoram tana hna an thawhnaah a tul ang zela thurawn pe a, amah finchhuah thin turin MJA te chu a chah a ni.

MJA President Pu C.Lalrambuatsaiha chuan I&PR Minister in an puala thingpui inhona leh inkawmna hun remchang a siam chu lawmawm a tih thu a sawi a. Hripui avangin chanchinbu leh a enkawltute chu a tuar nasa pawl niin anmahni a nghawng nasat thu a sawi a. Pension Scheme chu chak zawka bawhzui sak turin leh Press Tour leh Study Tour te buatsaihsak turin Minister a ngen a ni.

Press miten sawrkar an beiseina leh an harsatna neih te Minister hnenah an sawi bawk a ni.

Vawiina I&PR Minister leh MJA hruaitute inkawmna ah hian Pi H.M.Hualsangi Secretary I&PR Department; Pi Betsy Zothanpari, Addl. Secretary; Pu C. Lalnunkima, Director I & PR leh I&PR Department officer dang te pawh an tel a ni.