3337/2022-2023

Aizawl 24th January 2023: Vawiin khan Higher & Technical Education Minister Dr. R. Lalthangliana chuan Pachhunga University College Research Conclave 2023 chu PUC Seminar Hall-ah hawngin, khuallian a ni.

Khuallian Dr. R. Lalthangliana chuan PUC in Reseach Conclave 2023 ropui tak mai a buatsaih a vangin lawmthu a sawi a. Tun dinhmuna research scholars 61 an nei thei leh thlatin International Research paper publish thei institution a nih avangin leh kum 6 kalta chhunga journal leh lehkhabu publication 750 chuang an nei thei hi hlawhtlinna ropui tak a tling a ni a ti a. PUC hian undergraduate course subject chi hrang hrang 23 zirna neiin, heng bakah post graduate zirna Mizo, Philosophy, Life Science, Geophysics Department a nei hi hmasawnna nasa tak a ni a ti a. Session tharah Philosophy Department ah PhD zirna tura ruahmanna awmsa pawh Mizo ten zirna lama finna kan neih zau nan rahbi pawimawh tak a ni tiin - Principal leh Faculty thahnemngai tak tak te chungah lawmthu a sawi a.

Minister Dr. R. Lalthangliana chuan finna leh hriatzauna hi research atanga lo kal a ni a, a bing taka zirna- research chuan kan nitin nunah nghawng nei lo angin awm mah se, khuareiah changkanna hmasawnna kawngah min hruai zel thin a ni a ti a. Minister chuan PUC chu Central University funded a nih angin tun hnaiah faculty thahnem tak recruitment lak a ni a, 120 sanctioned posts ah 118 posts chu hnawh khat theia an awm chu a lawmpui thu sawiin faculty lak chungchangah a tam zawk mi 100 chu PhD nei saa lak an nih avang pawhin kan thalaite zirna sang bawhzuia zir chhunzawm zel an tam tawhzia a lantir a ni a ti a. NAAC Accredited A+ mai ni lo a, A++ hmuh belh zel tura tang sauh sauh turin leh research project 40 kallai mek leh research proposal an neih zawng zawngah duhsakna a hlan nghal a ni.

Hawnna hun hi Prof. Rinpari chuan kaihruaiin, PUC Principal Prof. H.Lalthanzara chuan kalkhawmte a lo lawm a. Prof. Lalramliana hnen atangin Report tawi ngaihthlak a ni a. Prof. K. Lalchhandama chuan DBT-Builder chungchangah presentation a nei bawk a. Dr. H. Laldinmawia hnen atangin PUC in khaw pali- Phulpui, Lungleng, Dulte leh tun hnaia an adopt Khawrihnima an hmalakna hrang hrangte a tarlang a. Adopted Village atan hian PUC faculty ten pawisa thawh khawmin heng an thawhkhawm atangin life skills, College admission leh thil dangah te awareness campaign leh tlawhchhuah program an nei thin a ni. Research Conclave 2023 hawnna hun hi Dr. K.Vanlaldinpuia chuan lawmthu sawiin a khar a.

Chawhnu lamah Technical Session neih a ni ang a, research paper hrang hrang zir hona leh presentation buatsaih a ni a. Ni hnih awh a ni ang.