3363/2022-2023

Kolasib dated 25th January 2023: Vawiin chawhnu khan MJA Press Club, Kolasibah MJA, Kolasib district Annual Conference 2023 neih niin Pu Lalruatkima, Minister, Information & Public Relations Department chu khuallian a ni a. Pu C.Lalrambuatsaiha, President, MJA, General Headquarters chu khual zahawm niin Pu Hmingthanzuala, DIPRO in a telpui a, Pu R.Lalnunmawia, Treasurer, MJA, Kolasib chuan hun a kaihruai a ni.

I&PR Minister Pu Lalruatkima chuan ziakmite chu thu leh hla hmang a ram leh hnam rohlu vawng himtute an nih thu leh thuziak chhiar tam mi chuan heng thu hmang hian finna an chharh chhuah țhin thu a sawi a, lehkhabu chhiar tam chu thalaite zing ah intihhmuh zel a pawimawh thu a sawi. Thutharlakkhawm hna chu hna zahawm tak a nih thu Minister chuan sawiin chu zahawmna hum tur chuan dikna leh rinawmna vawn nun tlat a țul thu a sawi a. Taimakna leh teirei peihna nen a thutharthehdarh hna thawktute chu ram leh hnam tihhmasawnna kawng a thawktu pawimawh tak an nih thu a sawi bawk a ni. Minsiter chuan India danpuiin zalenna zau tak a pek hmangin ram siamțhat hna an thawh rualin heng zalenna hmang sualtu ni lo turin chanchinbumite chu a chah a. Sawrkarin khalh ngil a ngaihna apiangah huai tak Sawrkar khalh ngil hna chu thawk zel turin a fuih a, khawvel changkanna in a ken tel thiamna hrang hrangte chu hmang țangkaitu ni zel turin a chah bawk a ni. Minister chuan ram hmasawn nana thil pawimawh tak chu a chhung a cheng mipuite hriselna a nih thu tarlangin dam rei tur leh hrisel tur chuan taksa insawizawi te, ei leh in uluk leh insumtheihna nunpui a pawimawh thu a sawi a, ram tan a hna thawk a hriselna tha nei zel turin chanchinbumi kalkhawmte chu a chah bawk a ni. Mizo țawng humhalhna kawng a mawhphurhna thui tak chu chanchinbumite kut ah a innghah thu Pu Lalruatkima chuan sawiin Mizo tawng dik hman leh ziah dan dik hmang tur a mipui kaihruaitu ni turin a chah.

Pu C.Lalrambuatsaiha, President, MJA General Headquarters chuan chanchinbumi hlawtling ni tur chuan midangte aia taimak chhuah a, thu rintlak, belhchiandawl leh tangkai ziah a pawimawh thu a sawi a. Thil chikmi leh zir peih nih a pawimawh bak ah khawvel changkanna ina a ken tel thiamthilte chu hman țangkai thiam a pawimawh thu a sawi.

Pu Andrew VL Auva, President, MJA, Kolasib chuan chanchinbumite chu ram rorelna kawng a thawktu pawimawh hlawm li zing a hlawm khat luahtu hial a chhal an nih țhin thu sawiin chanchibumite chu ram khalh ngiltu, khawtlang rilru sukthlek kawng dik a kaihhruai hna thawktu pawimawh tak an nih thu a sawi a. Heng hna pawimawh tak hlenchhuak tur chuan Mizoram Journalist Association member-te chu rilru fim, inpekna thuk tak leh ram leh hnam hmangaihna rilru puchung a hna thawk zel turin a chah a. Ramria hmalaknate, Sawrkar Department hrang hrang hnathawh dan enpuite leh mipui leh ram tan a thil țha a an ngaihahte MJA, Kolasib an chet chhuah dan a tarlang bawk a ni.