782/2023-2024

Aizawl 13th June 2023: Vawiin khan I&PR Auditorium-ah ‘Press Accreditation Card’ semchhuahna hun hman a ni a, Information & Public Relations Minister Pu Lalruatkima chu khuallian niin Mizoram Journalists' Association Gen. Hqrs. Office Bearer leh Executive Member-te hnenah ‘Press Accreditation Card’ thar a semchhuak a; Aizawl District huamchhunga Accredited Journalist-te Accreditation Card thar chu MJA President kutah a hlan nghal a ni.

Vawiin Press Accreditation Card semchhuahna inkhawm I&PR Director Pu C. Lalnunkima kaihhruaiah Khuallian I&PR Minister Pu Lalruatkima chuan sawrkarin chanchinbu mite a dah pawimawh hle tih a sawi a. Accredited Journalist ni tura State Press Accreditation Committee-in uluk taka a thlanchhuah ten Accreditation Card an dawng thei chu a lawmpui thu sawiin, tangkai taka hmang turin duhsakna a hlan. Journalist-te chu an thuziak leh thu puanzarin ram inrelbawlna thlenga nghawng a neih theih avangin an pawimawhna hre thar tur leh an thuziak te uluk lehzuala endik thin turin a fuih bawk. I&PR Minister chuan Journalist-te tan sawrkarin theihtawp a chhuah thin a ni tih sawiin, Journalist Pension Scheme pawh tihpuitlin thuai a nih tur thu a tarlang a. Tun dinhmunah Journalist Welfare Fund atan cheng nuai 20 dah a ni a, Press Tour vawi 5 neih tawh niin Parliament-a training nei turin chanchinbumite chu batch hnih lai tirh a nih tawh thu a sawi bawk. Press Accreditation Card hian tangkaina tam tak Mizoram chhung leh pawnah a nei tih sawiin, chutih ruala mawhphurna a ken telte chu hre reng turin chanchinbumite a chah nghal a ni.

Thu a sawi zelnaah Pu Lalruatkima chuan Information Technology-in khawvel a run mek a ni tiin technology chhuak tharte um pha tur chuan mahni insiamrem a ngaih chang a awm fo a, hmanraw thar hmang thiam zel turin chanchinbumite pawh mahni intuaihriam thiam turin a chah a. Social Media hmansualna a tam hle nia a hriat thu sawiin Minister chuan a bik takin tawngkam mawilo leh thuziak dik tawklo a hluar hle a, Accredited Journalist-te chu hemi kawnga fimkhur tura ngenin ‘Journalist Ethics’ vawng nung reng turin a sawm. Chanchinbumite chu mipuite hnena chanchinthar thlentu leh mipui kaihruaitu pawimawh tak an ni tiin an mawhphurnate hlen a, mipui hnena chanchin dik tak leh belhchiandawl chauh puang darh thin turin a ngen a ni. I&PR leh chanchinbumite chu chhungkua an nih ang takin thawkho tlang zel turin duhsakna a hlan a, ram leh hnam tana thawk an nih ang takin sawrkarin hmasawnna hrang hrang a thawhte pawh puang uar tura chahin, Mizoramin hmasawnna rahbi thar a rah zelna tura tul leh tangkai nia an hriatte chu sawrkar finchhuah fo tura chanchinbumite chu sawmin, ram leh hnam tana thawhhona tha a awm zel a beisei thu a sawi.

MJA Gen. Hqrs. President Pu C. Lalrambuatsaiha pawhin thu sawiin Press Accreditation Card semchhuah a nih theihna tura Minister leh I&PR Department-te hmalaknaah lawmthu a sawi a, Minister hnen atang ngeia Accreditation Card an dawng thei chu thil chhinchhiah tlak leh hlu tak a ni a ti.

Press Accreditation Card hi kum hnih chhung nung tur a ni a. Mizoram district hrang hranga atanga Mizoram Sorkar hnuaia Accreditation rawn dilte atangin State Press Accreditation Committee chuan uluk taka thlangchhuakin, a zavaiin Journalist 140 hnenah pek a ni a. Aizawl District bikah chuan Journalist 51 hnenah pek a ni. Accreditation Card semchhuana inkhawm hi Pu F.Lalfakzuala, Joint Director, I&PR chuan lawmthu sawiin hun a khar a ni.