781/2023-2024

Aizawl the 13th June 2023: Higher & Technical Education Minister Dr. R Lalthangliana chuan vawiin khan MINECO-a a pisaah Mizoram Scholarship Board buatsaihin tun hnaia UPSC exam hrang hranga tithate lawmpuina hun hmanpuiin Incentive Cash Award pawisafai cheng nuaikhat theuh a hlan nghal a ni.

H&TE Minister Dr. R Lalthangliana chuan UPSC exam buatsaiha tithate chu a lawmpui thu leh chhuanawm a tih thu a sawi a, an thlen chinah lungawi mai lovin a aia nasa zawka tang zel turin a fuih. Minister chuan a bikin UPSC Civil Service Exam 2022-a interview thleng pha mi 2-te chu tun kumah la tling rihlo mahse, beidawng lova tan la sauh sauh tura fuihin, engtik niah emaw chuan an tum ram an thleng ngei ang tiin duhsakna a hlan. India ramah ziak leh chhiar thiam tam lamah Mizoram chu dinhmun 2-na hauh pha state a ni chungin hnamdangte el pha tur chuan thiamna tak tak neih a ngai a ti a. Tunlai khawvelah mahni subject theuh chu thiam hneh a ngai tawh hle tiin thangtharte leh zirlaiten nasa lehzuala tanlak a ngai a ni a ti bawk.

Vawiina UPSC Exama tithate lawmpuina inkhawm tawi buatsaihah hian Principal Secretary, Higher & Technical Education Department Pi Esther Lalruatkimi leh Scholarship Board Secretary Dr. P. L. Ramliana te pawhin fuihna thu an sawi bawk a ni.

Vawiina Incentive Cash Award dawngte chu :

1). Dayne Thiamsangliana - UPSC (National Defence Academy) & Naval Academy Exam (II) 2019

2). Betty Lalrinfeli - UPSC Civil Service Exam, 2022 (interview thleng pha) leh

3). K. C. Zalena - UPSC Civil Service Exam, 2022 (interview thleng pha) te an ni.