780/2023-2024

Kolasib dated 13th June 2023:  Vawiin chawhma khan Diakkawn YMA Hall-ah Mizo Zirlai Pawl, Headquarters Kolasib buatsaih, High School Leaving Certificate leh Higher Secondary School Leaving Certificate Exam-a hlawtlinna chang te chawimawina hun an buatsaih a. Pu K.Lalrinliana, Minister, Food, Civil Supplies & Consumer Affairs Department chuan khuallian niin a hmanpui a, Pu Lalnunmawia Pautu, President, MZP, General Headquarters chuan Uaptu niin a telpui bawk a ni.

Khuallian Minister Pu K.Lalrinliana chuan Kolasib khaw chhungah HSSLC exam 2023-a School pahnih ah zirlai za a za (100%) pass awm te leh zirlai hlawhtlinna chang te zingah subject hrang hranga Letter hmu ṭhahnem tak an awm chu lawmawm a tih thu a sawi a. Tun ṭum a hlawtlinna chang ve ta lo zirlaite pawhin beiseina leh phurna thar nen, hlawtlinna sang zawk chang tur a inbuatsaih zui turin a fuih bawk a ni. Zirlai chuan an nu leh pa, an zirtirtute leh an khawtlang tan a an tih theih ṭha ber chu an zirna kawng a theihtawp chhuah leh hlawhtlinna chang tur a taimakna leh tumruhna nen zirna an kalpui tur a nih thu Minister chuan a sawi a, tihtakzet a beitute chu hlawhtlinna in a umzui tlat ṭhin thu a sawi. Zirna tihhmasawn nana zirlai pawlin hma an lak ṭhinna fakawm a tih rualin Pu K.Lalrinliana chuan hmun hrang hranga zohnahthlak inpumkhat lehna tura an hmalak ṭhinna chu entawntlak a tih thu a sawi a. Hmun hrang hranga harsatna leh buaina thleng avanga zohnahthlak ten Mizoramah an rawn raltlan thu sawiin inhawng tak a kan lo mikhual a, tuamhlawm leh ṭanpui an mamawhna apianga duhsakna kan lantir chu kan tihtur pawimawh tak a nih thu Minister chuan a sawi. Inpumkhatna, induhsakna leh inunauna ṭha siam leh intodelh tur a thiamna hmantlak leh kut hnathawh intihhmuhna chuan Mizo chu hnam zahawm leh ropui tak ah a siam theih thu a sawi bawk a ni.

He hun a thusawitu Pu Lalnunmawia Pautu, President, MZP General Headquarters chuan MZP in zirlai tiṭha chawimawina a buaitsaih nachhan chu zirna hmang hian kan ram leh hnam humhalh a pawimawh zia inzirtir a ṭul vang a nih thu a sawi a. Ram hmangaihna thinglungpu chung a zirna hmang a ram tihhmasawn chu zirlaiten zir chhuak ngei se a duh thu a sawi. Ngaihsan tur dik tak ngaihsan nachang hre turin leh mahni hnam a chiang a, mahni hnam ziarang zahpui lo turin zirlai naupang kalkhawmte a fuih bawk a ni.

Pu C.Lalruatdika, President, MZP Kolasib Headquarters chuan zirlai tiṭha chawimawina hun buatsaih a ni ţhin chu lawmawm a tih thu sawiin zirlai ṭhahnem zawkin chawimawina an dawn theih nan zirlaite, zirtirtute leh nu leh paten ṭan nasa lehzual a lak a ṭul thu a sawi a. Kolasib district chhung ah Commerce zirna a awm theih nana Minister Pu K.Lalrinliana leh Education Minister Pu Lalchhandama Ralte te hmalakna ah lawmthu a sawi a ni.

Kolasib khaw chhung a HSLC leh HSSLC 2023 zirlai titha chawimawina hun ah hian HSCL distinction-a pass zirlai 11, HSSLC distinction-a pass 18 leh 1st Division-a pass zirlai 55-te hnen ah lawmpuina thuziak hlan a ni a. SVEEP kaltlangin Election chungchanga hriattur pawimawh inzirtirna hun leh ‘Vawi khat hman Plastic’ hmang lo tur a thutiam lakna hun DUDO, Kolasib atangin neih a ni bawk a ni.