Vawiin khan I&PR Minister leh Bialtu MLA nibawk Pu Lal Thanzara chuan Govt. Edenthar Middle School Silver Jubilee lawmna a hmanpui a. I&PR Minister chuan Silver Jubilee lungphun a hawng nghal a ni.

I&PR Minister Pu Lal Thanzara chuan Govt. Edenthar Middle School in silver jubilee a lawm thei chu lawmawm a tih thu sawiin zirtirtute leh school enkawltute inpekna chu chhuanawm a tih thu a sawi a. Thlen china duhtawk mai lova tun aia nasa lehzuala tan laa ram leh hnam tana mi chhuanawm chher chhuak zel turin a fuih bawk a. Minister chuan zirlaite chu fuihin tunlai khawvelah hlawhtling tur chuan taimak a pawimawh ber a ni, a ti a. Zirlai ti thuanawp thei ruihtheihthil nena in hnuk hnawk lova nun uluk turin Pu Lal Thanzara chuan zirlaite chu a chah nghal bawk a ni.

Govt. Edenthar Middle School Silver Jubilee lawmna hun hi Headmaster Pu CVL Malsawma'n a kaihruai a, zirtirtu Pu Zahmingliana chuan school report kimchang a pe bawk a. Naupangte hnen atangin special item chi hrang hrang thlirho niin lawmthu sawina in hun khar a ni.

Govt. Edenthar Middle School hi kum 1992  a din niin tun dinhmunah zirtirtu 10 leh zirlai 74 an awm a ni.