Vawiin khan Lawngtlai District Task Force Immunisation (DTFI) chu Lawngtlai DC Conference Hall-ah Addl DC Pu H. Dolianbuaia MCS hovin an thu khawm a. Hri danna pek chungchanga hma lak dan tur hrang hrang an sawi ho.
He meeting-ah hian DTFI Member Secretary Dr S. Thaizi, District Immunisation Officer chuan hri danna pek beihpui thlak thawh hnihna (2nd round of Intensified Mission Indradhanush) thlenga Lawngtlai District chhunga hri danna pek tawh dan a sawi fiah a. IMI Round 1-naah session 12 neih tura ruahmanah session 10 neih niin, naupang 84 hri danna pek tum zingah naupang 65 pek theih an ni a. IMI Round 2-naah session 69 neih tura ruahmanah session 52 neih niin, naupang 540 hri danna pek tum atangin naupang 537 pek theih an ni thung. Round 1-na kalpui chhung hian naupang 16 chu a tum khatna atana hri danna la (first time immunisation) niin, a pawimawh chin la kim (fully immunised) 3 leh hri danna lak ngai zawng zawng la kim vek tawh (completely immunised) 3 an awm a. Round 2-naah a tum khatna naupang 106 awmin, a pawimawh chin la kim 52 leh la kim vek tawh 40 an awm bawk.
He thut khawmah hian Lawngtlai District-a sentut hri danna pek beihpui thlak tur (Measles-Rubella Vaccination Campaign) chungchang sawi ho nghal a ni a. Lawngtlai District bika mawhphur tura ruat WHO hnuaia Surveillance Medical Officer (SMO) Dr Amitabha Sarkar chuan sentut (measles) leh sentut-fang/ni-thum sentut (rubella) natna chungchang leh hri danna pek kawnga hma an lak dan tur a sawi fiah a. An hma lakna tura department leh tlawmngai pawl hrang hrang thawh hona a pawimawhzia sawiin, tha taka thawh hopuiah a sawm nghal a ni.
Lawngtlai CMO Dr Thani Pachuau leh District Medical Superintendent Dr Lalmalsawmi Hmar te paw’n MR campaign pawimawhna an sawi bawk a. Member kal khawmte atangin rawtna hrang hrang ngaihthlak a ni bawk.
Khawvel puma sentut vanga thihna thleng 1,34,200 zinga 49,200 zet chu India rama thleng a ni a. Hei vang hian WHO leh India sawrkar chuan hri danna pek lama nasa taka beihpui thlak a tum ta a ni. Tun hmaa sentut (measles) hri danna chauh pek thin chu, MR campaign hnuaiah hian a inkawpin sentut leh sentut-fang (measles-rubella) vaccine pek a ni tawh dawn a. Lawngtlai District-ah hian January ni 16, 2018-ah a hawnna neiin, January ni 18 atangin thla khat chhung district chhunga khaw hrang hrang fangin beihpui thlak a ni dawn a. Naupang thla 9 atanga kum 15 inkar tawh phawt chu, sentut an vei leh vei loh emaw, hri danna an lak tawh leh la lak loh emaw pawh sawi lova hri danna hi pek vek tum a ni a. He beihpui thlak hmang hian India ramah sentut hi umbo theih thuai beisei a ni.
Vawiin a thut khawmah hian Lawngtlai District-a Health Department lam thawktute bakah, education, social welfare, line department hrang hrang leh tlawmngai pawl ai awhte an tel a ni.
