Vawiin chawhma dar 10:30 khan Central YMA Hall, Tuikhuahtlangah Tuichangral Zirlai Pawl (TCZP) Freshers' Social leh Zirlai titha lawmpuina hun hman a ni a, I&PR Minister Pu Lalruatkima'n khuallian niin a hmanpui a, Pu H. Dolianbuaia, Project Director, DRDA, Serchhip chu khualzahawm a ni.

Tuichangral zirlai kalkhawm hmaah thu sawiin Pu Lalruatkima chuan Tuichangral Zirlai Pawl ten an huamchhunga khaw hrang hrang te hmasawnna tur atana hna an thawh dan leh hma an lak dan te a hriatin lawmawm a tih thu a sawi a. Zirlai hlawhtlingte lawmpuina thu hlan in kum 10 ral leh hnu a an thlen chin leh dinhmun beiseina sang tak nen thlir ani dawn a, taihmak leh tumruhna a pawimawh rualin mahni inthununtheih a pawimawh em em a, kohhran leh khawtlang thiltihna ah tel chin tawk hriat a pawimawh a, kan zirlai nen insubuailo turin mahni kan insiamrem a pawimawh a ni a ti. Pu Ruatkima chuan kan mithiam hranghlui ten mual an liam zel a, an hnungzuitu thalai te abikin All India Services leh Central Service ah direct a lut kan tlem tial tial hian tan kan lak nasat a tul zia a tilang ani a ti a, zirlai chawimawina dawng ve phalo te pawh tan la zel tura fuihin tuna an dinhmun ai chuan a tawpa an thlen chin kha a pawimawh zawk a, chumi tur chuan insiamthatna tur hun tam tak a la awm ani a ti a. Ram leh hnam humhalh hi ruithle mai mai chunga tihhlawhtlin chi a nilo a, thiamna leh finna nen rilru fim tak pu chunga tih a ngai ani a ti bawk.

Chawhnu lamah Career Awareness programme hman a ni a, Dr. Daniel Lalawmpuia leh Dr. Zonunmawia ten hun hmangin Zirlai pawl hrang hrang Mizo Zirlai Pawl, Mizo Students' Union, Shinlung Hill Students' Union leh Tuipuiral Zirlai Pawl aiawhten thusawina hun an hmang bawk. 

Tuichangral Zirlai Pawl hi kum 2003 a din a ni a Tuichanglui rala khaw 14 - Bawktlang, Biate, Chekawn, East Lungdar, Hmunzawl, Khawlailung, Leng, Lungchhuan, Lungkawlh, Mualcheng, North Vanlaiphai, Piler, Sailulak, Sialsir te a huam a. Vawiin a zirlai titha chawimawina an pek te hi an huamchhung khawchhuak HSLC, HSSLC, Bachelor Degree leh Master Degree exam result chhuak hnuhnung bera First Division leh Distinction a tling chin te an ni a, tunhnaia RUSA Asst Professor lak thar zinga an member pahnih te pawh chawimawina hi hlan an ni.