Tukin khan Aizawl Dawrpui Venga Mosolman Biak In Committee ten Mosolman Biak In hrula mipui tana an siam Tui thianghlim inna hmun ‘Water Point’ chu Bialtu MLA leh Sports Minister ni bawk Pu Robert Romawia Royte chuan a hawng.

Hawnna inkhawm tawiah thu sawiin Pu Roberta chuan Mosolman Mosque Committee-in mipuiin a thlawna in tur tui vawt thianghlim Bazar lun laia an chhawp chhuak chu an fakawm a tih thu a sawi a,  Mizorama Mosolman hnathawkte chu hmasawnna thlentute zinga mi an ni a ti. Minister chuan “Sorkar dan dinglai anga ILP neih ngei ngei erawh Sorkar leh NGO te bakah mipui pawhin kan phut a ni” a ti a, Mosolman Mizorama hnathawk turte pawh inhrilh thar zel turin Mosolman Mosque Committee te chu a chah a ni. Mizo society-ah veng leh khua hmasawn nan hnatlang neih fo a ni a, Mizo mipuiin phut lo mahse Mosolman hnathawka awmte hian an veng awmna hnatlangah te tha emaw sum emaw thawh ve thin chu an tihawm tak a nih thu a sawi bawk.

Tui in tur thianghlim hawnna puala function tawi hi Pu Mammon Majumdara, Aizawl Mosque Committee Secretary-in a kaihhruai a. He hunah hian Pu Lalrochuanga, Central YMA Treasurer pawhin ILP ngaipawimawh turin Zorama lo chhuak Muslim te chu a chah a, Central YMA chuan a check fo dawn thu a sawi bawk. Dawrpui Local Council Chairman Pi Baby Zosangzuali leh Dawrpui Br YMA President Pu Lalrammuana te pawhin thu an sawi bawk a ni.