Nehru Yuva Kendra (NYK), Lawngtlai chuan August ni 1, 2019 (Ningani) khan Swachh Bharat Summer Internship Programme hnuaiah bawlhhlawh tawih thei lo, khawlai titawptu leh leilung tichhe theite kg 1 Rs 20/- zelin an lei khawm.

NYK model village Thingkahah Branch Young Lai Association (YLA) nen tang kawpin bawlhhlawh hi lei khawm niin, a vaiin kg 540 lei a ni a, bawlhhlawh lei nan hian Rs 10,800/- an seng a. He'ng bawlhhlawh tawih thei lo an lei khawmte hi a paihna tur hmunah paih nghal vek a ni.

NYK District Youth Co-Ordinator Pi Mercy Sellate chuan NYK-in heti anga hma an lak chhan hi naupang rilruah faina leh thianghlimna pawimawhzia tuh ngheh a nih theih an beisei vang a nih thu a sawi a. He hma lakna kalpui hian naupangte chu faina lamah kawng dik a kawhhmuh dawn a ni, a ti.

NYK hian naupang leh thalaite'n nun kawng dik an zawh a, khawtlang leh ram tana mi tangkai leh chhawr tlak an nih theih nan kawng hrang hrangin hma an la thin a ni.

Faina kawnga hma lakna peng khat atana bawlhhlawh tawih thei lo lei khawm hi Lawngtlai khawpui chhung Chawnhu-ah pawh Branch YLA hma laknaa kalpui thin niin, naupangte'n bawlhhlawh tawih thei lo an chhar khawm chu Branch YLA hian anmahni sum sengin an lo leisak thin bawk a ni.

Attachment

  • Loading attachment...