858/2023-2024

Aizawl, 20th June 2023: Ministry of Tribal Affairs in Article 275 (I) hnuaia grant a pek hmanga sikul sak that tur Govt. Tuikual North Middle School leh Vaivakawn High School te chu I&PR Minister, bialtu MLA ni bawk Pu Lalruatkima chuan vawiin khan a tlawh a. Minister hi AMC Deputy Mayor, Ward XII bialtu ni bawk Pu R. Thanglura, School Education Department hotute leh khawtlang hruaitu ten an tawiawm a. Sikul enkawltute nen sikul sak that dan tur an sawiho nghal a ni.

Pu Lalruatkima chuan a bial chhunga sikul pahnih sak that a ni tur chu lawmawm a tih thu leh pawisa awm te tangkai taka hman ngei a nih a beisei thu a sawi a. Hna tha, tlo leh mawi a awm theih nan khawtlang hruaitute leh sikul thuneitute thawhpuina a ngen nghal a. Leilung malsawmna fur ruahtui Mizoramin a dawn te khawl khawm a tul a ni tiin, sikul sak thatna turah pawh fur ruahtui khawl (rain water harvesting) ngaihpawimawh ni se a duh thu a sawi bawk.

I&PR Minister chuan Mizoram sawrkarin zirna tihhmasawn a ngaihpawimawh thu sawiin, zirtirtu indaihlohna phuhru turin sawrkar term kal mekah zirtirtu 3000 chuang lak an nih tawh thu a tarlang a. Zirtirtute chu zirlaite hmakhua an chungah a innghah avangin an hna rinawm leh tha taka thawk zel turin a chah a. Zirlai naupang kalkhawmte pawh malsawm dawnna bul chu nu leh pa te thuawih a ni tih hre reng tur te, lehkha chhiar tam tur leh an thiamna te ram leh hnam tana hmang turin a fuih bawk a ni.

AMC Deputy Mayor Pu R. Thanglura pawhin Sikul sak that chu khawtlang tan pawha chhenfakawm leh chhawrhnaawm tak a nih a beisei thu a sawi a. Sawrkar sikul te hmasawnna chu zirtirtute kutah engemawchen a innghat a ni tiin, zirlaite an enkawlna ah thahnemngai zual deuh deuh turin thawktute chu a chah nghal a ni.

Govt. Tuikual North Middle School hi kum 1970 khan din a ni a, tun dinhmunah zirlai 43 awmin zirtirtu 11 an awm mek a. Vaivakawn High School hi kum 1992 a din niin, zirlai 30 an awm mek a. Tuikual North Middle School sak that nan hian cheng nuai 60 ruahman niin, Vaivakawn HS tan cheng nuai 70 ruahman a ni.