Tuipuiral Zirlai Pawl (TZP) General Conference Vawi 35 na hman mek 'Vangtlang Inkhawm' Dungtlang Community Hall-a neih chu vawiin khan I&PR Minister Pu Lalruatkima chuan khuallian niin a hmanpui a, he hunah hian East Tuipui bialtu MLA leh Bamboo Link Road Board Vice Chairman Pu Ramthanmawia chu khualzahawm a ni. He khawmpuiah hian thupui atan 'Zirlaite leh tunlai khawvel' tih chu hman a ni.

Khuallian chuan Tuipuiral Zirlai Pawl kaihhruaina hmanga General Conference tum 35 na lai neih ani thei chu ropui a tih thu leh khawtlang tanrualna a fak a. Tuipuiral khuate chu khaw inthurual leh nuam tak anih thusawiin, amah ngei pawh a inthlahrung loh thu leh nuam a tih thu a sawi a. Bialtu MLA thahnemngai tak an nei chu an vanneihpui hle a hriat thu sawiin, Tuipuiral chu miropui tak tak te lo chawrchhuahna hmun a nih thu sawiin, an tha chhang dawltu tur awm loh a hlauhawm thu sawiin, Zirlaite chu an hniakhnung zui ve thei tura tan la sauh sauh turin a fuih a. A thiam leh hmangchang hriate dinchhuah zelna khawvel a kan awm avangin kan elpuite laka dingchanga hlawhtlinna chang tur chuan kan hriam ve tawk angai a ni, a ti a. Minister chuan hnam tlemte kan ni a, hnam chak leh ropui ni thei tur chuan tam turin fa neih tam inzirtir angai a, kan ram hmun ramri dep thlenga kan luahlum angai ani, a ti a. Mizo mipate chu pasal tlak, rilru puitling leh eizawnna ngelnghet nei thei tura kan inzir angai ani, a ti bawk.

Pu Lalruatkima chuan hmasawnna ruhrel din kawngah rinawm leh taima taka kan thawh angai ani tiin, hlep tam aia hna tha thawh tam lamah inel a tul a, he ram hmasawnna hi kan kutah a awm a, neitu thinlung kan put phawt chuan nakin lawkah ram nuam leh duhawm tak kan siam thei dawn ani, a ti a. Kalkhawmte chu khawtlang tana hnawksak a awm lo tur leh mahni theihna zawn ang zelah theihtawp chhuah turin a chah a. Zirlaite chu taima leh rinawm taka lehkha zir tura fuihin, zir thiamna chu hnathawh thiamna a ni, a ti a. Khawtlang leh ram mamawhte hian min auchhuak se, tun aia tang lehzuala zirna lama beihpui kan thlak angai a, chu chu nakin zela hnam damna tur ani, a ti bawk. Bial mamawh resolution thlente pawh Sawrkarin ngaihtuahna sengin a tul ang zela hma a lak tur thu a sawi a. Sawrkarin Zirna ngaipawimawhin Zirtirtu 900 chuang a la thar a, nakin zela zirna tihhmasawnna turin khawtlang pawh lo inruahmana inpuahchah turin a chah a. Zirlaite chu rinawmna, taihmakna, tumruhna leh dawhtheihna nena zoram din thar tura rilru leh ngaihtuahna seng thar turin a sawm nghal a ni.

Khualzahawm Pu Ramthanmawia pawhin thusawiin, Sawrkar thar hun reilote chhungin Minister hrang hrang te'n East Tuipui bial ngaipawimawha an tlawh thin avangin lawmthu a sawi a. Tunhnai maia Dungtlang Out Post, Police Station puitling a hlankai ani chu lawmawm a tih thu sawiin, sawrkar hotute duhsakna leh ngaihsakna a fak a. Resolution pass takte pawh ngaihtuahna a lo sen tawh thin thu leh bial chhung mamawh leh duhte tihhlawhlin kawngah bial mipuite thlawpna leh finchhuah thinna a mamawh thu a sawi a. PHC Farkawn sakthat anih theihna turin Tribal Affairs Ministry atanga phalna hmuh anih thu leh sakthat ngai dang 3 te pawh a tul ang zela bawhzui tum a ni, a ti a. Bial chhung mipuite hriselna kawnga mamawhte a tul anga bawhzui zel ani tiin, Farkawn PHC ah bial mipuite hman theih turin Ultrasound khawl bunfel anih thu a sawi a. Sawrkar laipui school tha Eklavya Model Residential School (EMRS), pawl 6 atanga 12 thlenga a thlawna zirna, naupang 200 len theihna tur pawh cheng vaibelchhe 24 sengin Khawbungah din tum a ni, a ti bawk. Bial tana TZP thahnemngaihna fakin, Zirlaite chu zirlai dah pawimawh hmasa ber tur leh a behbawm dangteah buai lo turin a fuih a. National level Competitive Exam-a chetha thei tura theihtawp chhuah tura fuih pahin tih tak zeta beite chu puih a inhuam thu a sawi a. A bial chhung thalaite chu nun hrisel leh thianghlim zawh fo thin tura fuihin, hnam ze rilru pu tlata, tunlai thalaite tibuai em em tu AIDS natna laka fimkhur hle turin a fuih nghal bawk a ni.

Vawiin Vangtlang Inkhawm hun hi Samuel Zorinsanga, Vice President, TZP chuan a kaihruai a. Zairemthanga, General Secretary-in inhmelhriattirna leh report a pe a. President Zothansanga'n fuihna thuchah a sawi a. TZP inkhawmpui vawi 35 na January Ni 7-9 chhung awh hi nimin khan Dungtlang Community Hall-ah neih tan niin, Palai lawm, rorel leh hruaitu thar thlanna hun nimin lamah neih a ni a. Vawiin hian Lalsailova, Ex-President, TZP kaihhruinain resolution 3 pass niin, East Tuipui huamchhungah Sawrkarin Civil SDO dah rawh se, Sawrkar enkawl HSS din ni rawh se tih leh Sawrkarin PHC Doctor awm lohnaah Doctor dah rawh se tih te chu lungrual taka pawm a ni.

He hunah hian Kum 2019 chhunga High School leh Higher Secondary School-a Zirlai First Division chin chunglam a pass te, Bachelor leh Master Degree neite, HSLC Exama 100% School pass- 3 te leh Special Award dawngtu 7 te chawimawina neih ani a. Zorammawia, Asst General Secretary-in lawmthu sawina neiin hun a khar a ni. Chawhnu lamah thupui zirna hun neih niin, Pu H.Lalhminghlua, Addl DPC, SSA Champhai District, Ex-President, TZP chuan thupui 'Zirlaite leh tunlai khawvel' tih hmangin zirtirna a pe a ni.

Tuipuiral Zirlai Pawl hi kum 1986 a din niin, 'Learn for Wisdom' tih chu an thupui ber a ni a, East Tuipui bial Khaw hrang hrang 25 atanga intelkhawm zirlai pawl lian ber a ni. General Conference hi kum tin neih thin niin nakumah Khankawn khuain a thleng dawn a ni.

Vawiin General Conference-ah hian Zirlaite, Tuichangral Zirlai Pawl aiawh, Tuipuiral NGO aiawh, hruaitu hlui leh Tuipuiral chhunga Zirtirtu te'n an hmanpui a ni.

I&PR, Rural Development leh Revenue changtu Minister Pu Lalruatkima chuan tukin khan NLCPR sum cheng nuai 369.89 senga sak mek Khawbung Mini Sport Complex, a huna zawh hman loh pawh a hmunah kalin a enfiah a. Thal hna thawh theih hun chhunga hnathawh ngai chu zo hman ngei tura hmalakpui a tum thu khawtlang hruaitute a hrilh a, Minister hi Pu A. Chhalai, EE, Rural development department leh midang engemaw zatin an ?awiawm a ni. Mizo Hlakungpui Muala nauban khawite a him zawkna atana Hlakungpui Committee-in hung an duhthu an thlen pawh Khawbung BDO nena ruahmanna lo siam turin a hrilh a. Minister hian tukin khan BDO Complex a tlawh bawk a, BDO Pu Vanlalchhuanliana leh Staff te'n lo dawngsawngin quarter sak ngai leh thil ?ul hrang hrang an lo thlen a ni.