Mizorama colour chanchinbu chhuak hmasa leh Sunday newspaper awm chhun Zalen chanchinbu chuan vawiin khan an kum 15(Quindecennial)tlin lawmna programme, Aijal Club-ah an hmang a. I&PR Minister Pu Lalruatkima chu Khuallian niin Zalen Quindecennial Celebration puala buatsaih, ‘Mizo of the Decade’ atana thlan chhuah, Pu R.Ramhmangaiha, Hnamchantu hnenah chawimawina a hlan a ni.

Pu Ruatkima chuan Zalen chanchinbu in kawng bumboh leh harsa tak te paltlanga kum 15 hmel a lo  hmu ta chu a lawmpui thu a sawi a. Ram thang zelah mipuite rilru puthmang a tha zawnga kaihruai turin chanchinbumi te leh thuziak mite an pawimawh zia tarlangin thalai ten chanchinbu leh lehkhabu chhiar an uar thar leh a pawimawh tak zet a ni, a ti a. Hnam changkang apiang ten finna lungphum lehkhabu an ngaina in an chhiar hnem a. Hnam changkang te tih dan kan entawn rau rau a nih chuan an lehkhabu chhiar nasat hi entawn ang u, tiin kal khawmte hma ah a sawi a. Zalen chanchinbu kum 15 tlin lawmna puala buatsaih, ‘Mizo of the Decade’ nominee 7 te chu anmahni zawn theuhvah Mizo te tana sulsutu  pawimawh te an ni, tiin ram leh hnam tana an hnathawh te chu a fak a. Hmachhawp an neih theuhvah duhsakna a hlan bawk ani.

Zalen kum 15 tlin lawmna puala buatsaih ‘Mizo of the Decade’ atan hian nominee 7 awmin chungte chu 1.Thanzuali Tochhong, Gospel Centenary School, 2. T.Lalmuanpuii Chairperson Mizoram Commercial Apex Bank, 3. R.Ramhmangaiha, President, Hnamchhantu, 4. H.V.Lalzuimawia Entrepreneur, 5. Lalnghinglova Hmar, Jt.Editor Vanglaini, 6. K.Lalmuansanga, ASEP Founding Member, 7. Dr.R.L.Sanghluna Presbyterian Synod Hospital, Durtlang te an ni a. Tehfung hrang hrang hmangin heng nominee 7 te hi an chanchin leh hnathawh/hmalakna te enfiah hnuah Hnam Chhantu President R.Ramhmangaiha chu ‘Mizo of the Decade’ atan thlan chhuah niin Award, Mizopa Sculpture mawi tak leh Rs.10000/- hlan a ni.

Vawiina Zalen Quindecennial lawmna inkhawm hi Dr.Chawnglungmuana’n a kaihruai a. Mizo of the Decade thlangtu Panel atangin Rev.Dr.L.H.Rawsea, Associate Professor(HoD), ATC in report a pe a ni.

Khuallian Pu Lalruatkima chuan Zalen Quindecennial lawmna programme a hman zawhin I&PR department hnuaia Lianchhiari Run sak mek chu a hmunah tlawhin Department hotute bakah PWD hotute leh Planning officer te nen an en nghal a. He building sak hna kal mek a tul anga endik a, vil turin PWD hotute nen ruahmanna te an siam a ni.