National Institute of Social Defence, Ministry of Social Justice and Empowerment leh DIET Champhai-te tangkawp buatsaihin vawiin khan School Community member-te hnenah Ruihhlo hmansual  ven dan tur chungchangah nikhat awh inzirtirna hun hman a ni a. DIET Champhaia thawk Lecturer te’n thupui hrang hrang hmangin zirtirna an pe a ni.

He hun DIET Multipurpose Hall, Champhai Zotlanga neihah hian Pi Vanlaldiki, Lecturer diet Champhai  chuan ruihhlo in ram a tihbuai zia sawiin, damdawi hmansual hluar lutuk ven kawngah sawrkar leh pawl hrang hrangte thawhhona tha a pawimawh tih a tarlang a. Ruihtheihthil ti hi a kum telin an tam zel a, chhungkua leh Kohhran te chu a tuar tu kan nih zel avangin he awareness Campaign hi buatsaih a ni a ti a, a hnen atangin tleirawl/rawlthar te'n ruihhlo an hmansual avanga an tawrh theih hrang hrangte ngaihthlak a ni a. India rama tleirawlte dinhmun tarlangin,  khawvel pumah ruihhlo hmangsualtu an pung zel a, chumi zingah chuan tleirawlte hi dinhmun derthawng ber a dingte an ni, a ti a. Ruihhlo an tih chhan hrang hrang tarlangin tleirawl an nih laia an chhungte aia an thian te an ngaihpawimawh vang leh an rin zawk vang a ni tlangpui a, thian tha lo an lo tawn palh avangin ruihhlo an khawih phah thin a ni, a ti a, hei bakah hian thil thar duh hunlai an nih avangin tihchhin chakna an nei a, a hnu zela a nghawng tur engmah an thlir thiam lova, hlauthawng miah lovin an ti chhin thin a, a chang chuan thian neih loh hlauh vangin ruihhlo tih an chin phah thin niin a tarlang a, ruihhlo tihin a nghawng tha lo tak takte leh ruihhlo lo ti rei tawh te'n harsatna an neih dan te a tarlang a, an chhungte ngei pawhin an awmpui peih lo hial thin a, hei vang hian tleirawl an nih atanga an nun venhim hi khawtlang in an tih ngei ngei tur a ni a ti bawk.

Pu R. Lalsawmliana, Lecturer  hnen atangin tleirawlte'n ruihhlo an hmansual theihna tur lak atanga ven dan leh thunun theih an nih dante chipchiar taka ngaihthlak a nih bakah, Pi Baby Lalrindiki, Lecturer hnen atangin rilru hrisel  neih theihna tur leh hrisel tura invawn dan tur kawng pawimawh tak tak ngaihthlak a ni a, Dr. C. Lalnunzira, Lecturer  hnen atangin tleirawlte nungchang tlangpuite ngaihthlak a ni bawk.

He hunah hian NGO hruaitute, Kohhran hrang hranga Thalai hruaitute leh Zirlai nu leh pate an tel a ni.