Vawiin khan Social Welfare & Tribal Affairs buatsaih ‘Two Day Training of Service Providers working with Children in difficult circumstances’ chu  Social Welfare Director Dr. Ankita Chakravarty chuan ICPS Training Hall, Laipuitlang-ah a hawng.

SWD Director Dr. Ankita Chakravarty chuan naupang enkawl kawnga mawhphurtuten training pawimawh tak an hmang thei chu lawmawm a ti a. Social Welfare Department-in kum 2017 a Survey-in a tarlan danin a tlangpuiin kum 15 atang hian meizial (vaihlo kaihhnawih) leh a hnim chi (solvents) an ti tan a, kum hnih chhung lekin Ganja (cannabis) an lo ti chhova, kum 19 an lo tlin meuh chuan damdawi ruihtheih (pharmaceutica opiods) an lo khawih tawh a, hemi atanga kum khat chhung lekin inchiu chi (injecting) ah an lut chho ta thin a ni a ti a. Naupang atanga tleirawl chhoh hian a tlangpuiin meizial leh a hnim chi an ti tan a, nula/tlangval an lo nih chhoh chuan damdawi ruihtheih an lo khawih tawh a ni. Hemi tang hian a tirtea meizial leh a hnim chi-a an lut tur hi a ven dan tur ruahmanna siam nan he training hi a pawimawh hle dawn a ni a ti. Naupang/tleirawlte kaihhnawiha thawktute tan kawng tam takah he training hmang hian rah tha a chhuah ngei a beisei thu leh Mizoram tana tangkai taka thawk tur leh ruihhlao hmansual chungchangah Social Welfare & Tribal Affairs te nen thawhhopuiah a sawm nghal a ni.

He training hi Ministry of Social Justice & Empowerment, Govt. of India bultumin Mizoram Social Defence & Rehabilitation Board, Social Welfare & Tribal Affairs, Social Welfare Department leh Integrated Child Protection Society, Mizoram te tangkawpa buatsaih a ni a. He training-in a tum ber chu Women & Child Development hnuaia ICPS ten ruihhloin a tihbuai naupang enkawltute naupang enkawl kawnga an tha tihchak theih dan tur zirhona a ni.