59/2022-2023

Aizawl, the 6^th April 2022: Vawiin chawhma khan I&PR Minister Pu Lalruatkima chuan Vanapa Hall-ah Mizoram Handloom & Handicraft Development Corporation Ltd (ZOHANDCO) in a huaihawt, April 8, 2022 thlenga neih tur, ‘Craft Bazaar” chu mipuiin an dawr theih turin a hawng. Craft Bazaar hi Ministry of Textile hnuaia Development Commissioner (Handicraft) bul tuma buatsaih a ni a. He Dawrpui hawn chhung hian thiam hnang deh hmanga siam bungraw hrang hrang, tangkai tak tak leh mawi tak te lei theihin chhawpchhuah a ni.

I&PR Minister Pu Lalruatkima chuan kan hnam incheina leh pi leh pute atanga kan themthiamna thil te chu hnamdang laka kan nihna tichiangtu, thil hlu tak leh vawn nun reng chi a ni a. Chutiang kawngah chuan ZOHANDCO in mawhphurhna a nei a; chuvangin coporation thiah tak zingah an tel lo a. Tunah phei chuan Corporation pawimawh tak leh hmasawn zawnga hmalam pan mek an ni a. ZOHANDCO in hma a sawn zel chu thil lawmawm tak leh Mizo Handloom & Handicraft huanga eizawngte tan phei chuan vanneihna a ni a ti.

Mizo la deh atanga tah chhuah – pawnchei leh incheina chi hrang hrangte leh them hnang deh atanga Mizo ten themthiam taka an siam thil chi hrang hrangte Mizoram pawnah pawh hriat a hlawh tawh hle tih a sawi a. A siam mawi, a siam tlo leh a siam that kawngah hmasawn erawh a la ngai a; a hralhchhuah kawngah pawh mumal zawka branding nei thlap a kalpui pawh a tul tawh hle a ni a ti.

Mizorama rawn zin veivak, sawrkar khualthate leh kan thiantha thenkhatte zawng zawng lo duhsak nan thilpek kan leklam ber chu Mizo Handloom & Handicraft kutchhuak te a ni a. Kan peka te pawhin hei hi an duh ber a ni a ti. State chhungah tlem a zawng siamchhuah leh hralh chhuah a ni deuh mai a, tam tham zawka siam chhuah a, state sum hnar pawimawh taka siam tum a ni a. Hei hian mi tam tak tan eizawnna tha tak a siamsak nghal bawk dawn a ni a ti. I&PR Minister Pu Lalruatkima chuan hemi kawngah hian SEDP chuan nasa takin awmzia a nei dawn a. He Flagship programme-ah hian beneficiary te thawh duh leh thawh thiam  ngaih pawimawh sak a ni a. Hei vang hian SEDP hnuaiah Mizo Handloom & Handicraft huanga hmalatute tan huntha a in her chhuak dawn a ni a ti.

Craft Bazaar hi April 8, 2022 thleng khian nitin Vanapa Hall-ah neih a ni dawn a. He dawrpuiah hian a duh a piang te tan Mizopa kutchhuak mawi tak tak – thing atanga siam te, themhnang atanga siam te, tlereuh te, thawmhnaw lam chi te leh a dang tam tak lei theihin dawr hrang hrangah phochhuah a ni.

Craft Bazaar hawnna programme hi Pu C.Lalrinmawia, Manager, ZOHANDCO chuan a kaihruai a. Pu C.Lalrammawia, Chairman, ZOHANDCO chuan Craft Bazaar chungchangah leh Mizo Handloom & Handicraft hmanga eizawng – artisan te pualin sawihawnna hun a hmang a. He hunah hian Pu Lalthlengliana, Chairman, ZIDCO, Pu Lalthanliana, Chairman, Mizoram KVI Board leh mi pawimawh dang te pawh an tel a ni.