Vawiin chawhnu khan I&PR Minister Pu Lal Thanzara leh Mizoram Journalist Association (MJA) Hruaitu thlan tharte chuan thingpui inhona leh inkawm hona hun a office chamber-ah an nei a. Minister hnenah hian an harsatna hrang hrangte thlen nghalin chak taka hmalakpui turin an ngen nghal bawk a ni.

MJA hruaitute hi an President Pu Vanlalrema Vantawl in hovin, General Secretary-in sawrkar a an mamawh hrang hrangte lehkha a ziakin a thlen a, Minister chuan an thu thlen te chu a theih ang anga hmalakpui a tum thu hrilhin Journalist-te thu thlente zinga an ngaihpawimawh zual bik priority list siama theh lut leh turin thurawn a pe nghal bawk a ni.

MJA hruaitute chuan chanchinbu mite chu kawng hrang hranga hmanraw tangkai tak an nih thu sawiin, hmang tangkai zel turin leh Department hrang hrang tan pawh a tul hunah sawm theih an nih thu he an inkawmna hunah hian tarlan a ni.

I&PR Minister hi Pu L.R Sailo, Press Secretary to Chief Minister in a tawiawm a ni.