Nimin Ni.4.5.2016 khan Vairengte Community Hall ah SDO (Civil) Vairengte, Bamboo Development Agency, Mizoram State Rural Livelihoods Mission leh Bilkhawthlir RD Block tangkawpte chuan North Eastern Council puihna in mau hmanga thil siam chhuah leh hman tangkai dante zirtirna atan ni khat awh Workshop an buatsaih.

Zirtirna petu, Cane & Bamboo Technology Centre (CBTC) Guwahati-a Manager Pu Peo Kumar chuan khawvel pumin thing aiah mau hmang uar turin inzirtirna an kalpui mekah kum tam tak mau hman lo buaipui tawh China an thlir thup a, a dawta India an thlir leh mekah, India bikah chuan Mizoram chu mau tamna anih avangin Central Sawkar pawhin hma an la mek tih a sawi a. Mahse mau tam hu angin Mizoram chuan mau hmanga thil siamchhuah kawngah thenawm state in tluk lova tiin tan lakna tur tam tak a awm nia a hriat thute a sawi a. Mau hmanga thil siam chhuah chungchangah zirtirna pe tur leh kan hriatna te rawn hrilh turin kan lo kal a, tih tak zeta hma in lak a pawimawh mai bakah in thil siamte in ulukin, a quality a tha tur a ni, a ti bawk.

Pu C. Lalrinawma, Cluster Development Officer, Bamboo Development Agency chuan tunhnaia Union Minister, Mizoram rawn tlawhtu chuan Mizoram chu Bamboo State ah siam a duh thu a sawi chu sawi chhawngin hemi atan hian Central Sawrkar in theihtawp chhuah a tanpui a in huam a ni, a ti.

CBTC atanga lokal mithiamte chuan mipui kalkhawmte zirtirna an pe a ni.