Vawiin hian Lawngtlai District Task Force on Mission Indradhanush chu an chairman Dr. A. Muthamma IAS, Lawngtlai bawrhsap ni bawk hivin a chamber ah kum Indradhanush Phase 3, round 2 kalpui dan tur relin an thu khawm.

Phase 3 round 1 Mission Indradhanush hi thla hmasa khan neih a lo ni tawh a, kha tah khan khaw 70 tuam chhuah a, naupang kum 2 hnuai lam mi 1195 leh nu naupai mi 352 te hnenah a thlawna vaccine pek vek tura ruahman a ni a, amaherawh chu beisei ang thlapin vaccine hi pek kim a ni chiah lo thung a ni.

May thla chhunga round 2 kalpui leh turah erawh hi chuan target hi a tlahniam hlek dawn thung a, khaw 55, kum 2 hnuai lam naupang mi 978 leh nu naupai mi 264 te hnenah vaccine pek tuma thawhchhuah a ni ve leh ang.

Lawngtlai District chhung, a bikin khawthlang lamah vaccine lak tul tilo an la tam avangin Lawngtlai Bawrhsap Pi A. Muthamma chuan sumsen tur ngaihtuah chawpin tunah hian khawtina tar tur, ziak leh chhiar thiamlote pawhin an hriatthiam theih tur Poster (Pictorial) a ruahman tir mek a, heng bakah hian Bawrhsap hian LADC CEM leh khawtin VC te lehkha thawnin naupang leh nu naupai mekten vaccine kokim taka an lak theih nana thawhpuiah a sawm a ni.

Mission Indradhanush hi naupang kum 2 hnuailam leh nu naupaiten vaccine tha a thlawna an lak ngeina tur ruahmanna niin khawtinah kalin damdawi lam thiam leh thawktuten vaccine hi an pe thin a ni.