Vawiin hian tunlai Vawk hri leng chungchang, Lawngtlai leh a chhevela mi zirchiang turin Directorate, AH & Vety Department, Aizawl atangin mithiam rual an rawn kal.

Aizawl atang hian Dr. Jasper Rongura Sailo, Jt. Director hovin Dr. C. Neihthangpuii, Vety Officer (Pathology) leh Dr. Lalrinkima te an rawn kala, vawiin hian Lawngtlai Bawrhsap Dr A. Muthamma kawm nghalin Vawk hi District pawn atanga Lawngtlai District chhunga lakluh leh District chhung khua leh khuaah pawh lak luh/sawn khap nghal nise, tiin an rel a ni. Bawrhsap nena an inkawm ho hnu hianLawngtlai DVO Chamber ah District AH & Vety a Officer te leh LADC a Vety Officer ten en inkawm hovin hmalak ho dan tur an sawi ho bawk.

He mi hnu hian hmun hran hran atangin vawk thisen sample an lakhawm nghal a, heng an thisen sample lak te hi enfiah turin Aizawlah an keng phei dawn a ni.

Lawngtlai leh a chhehvela vawk hri leng hi Vety Department in enkawlna a pek ang te an la zia pui rih nia hriat a nih thu Lawngtlai DVO Dr. Zonghinga chuan a sawi a, chutihlaiin vawk natna dik tak hi hriatchhuah a la nih loh avangin vawk thi reng reng mahni thua lo thehthang mai lova Department hotute hnena hrilh zel a that ber thu leh chumi hnua a phumbo dan ngaihtuah chauh a that thute a tarlang bawk.

Tun dinhmunah chuan kan vawkte fai taka sila, thianghlim taka enkawl a pawimawh thu leh natna venna awlsam taka kan neih theih Tuisen, Phenyl leh Chinai tuite hmanga zing deuh taka kan vawk vulhte bual thin turte, vawk dangte nena intlawhpawh tir rihlo turtein vawk vulhtute an ngen a ni.