Mizoram Chief Minister Pu Lal Thanhawla’n Mizoram Law College building thar Luangmualah a hawng.

Chief Minister Pu Lal Thanhawla chuan Law College-in kum tam tak chhung ka in, ka ram tih tur nei lova mi in luah kuala an awm hnuah anmahni pual ngeia building tha tak an nei thei ta chu a lawmpui a. He hmun atang hian dan siamthatu, rinawmna leh dikna ngaina, sum siam nan chauha hna thawk lova midangte tana malsawmna nih tum zawk, mi zahawm an chawrchhuah ngei a beisei thu a sawi. Chief Minister chuan zirna siamtha tura hma an lak dan sawiin term hmasaah India rama awm ngai zen zen lo zirna peng tinreng thlir kimtu Education Reforms Commission dinin an rawtnate tihpuitlin mek a nih dan te, sum dinhmunin a zir loh avanga duh anga chaka hma lak theih a ni loh dan te a tarlang a. Education changtu Minister leh Parliamentary Secretary te bakah, he department hnuaia thawktute tan tlanna avangin Mizoram zirnain hma a sawn hle a ni, a ti. Building thar an neih chu vawng thianghlim tura chahin Chief Minister chuan India ram pumah Swachh Bharat Mission kalpui mek a ni a, Mizote hian faina leh thianghlimna kawngah te, zuk leh hmuama insum theihna kawngah zir tur kan ngah hle a ni, a ti bawk.

Khual zahawm Higher & Technical Education changtu Minister Pu R.Romawia pawhin thu sawiin dan hre mite chu mi chanhai leh chhumchhiate dikna humhalhtu, ram leh mipui tana thlamuanpuiawm nih tum turin a chah a. Lawyer chherchhuaktu college in hun rei tak atanga an lo thlir tawh college building tha an nei chu lawmawm tiin pi leh pu atanga zirna ngaisang hnam kan nih angin Zirna In kan din theihna tur hmun ram tha zuah nachang hre turin mipuite a chah a ni. Tun dinhmunah Aizawl khawpui chhung college thenkhat chu ram neih loh avangin an buai a, than zelna tur hmun an neih loh avangin duh angin hma a lak chak theih loh tiin vantlangin kan intawm Biak In leh Zirna In atan hian hmunhma kan induhsak thiam a tul hle, a ti.

Law College hawnna inkhawm kaihruaitu Parliamentary Secretary Pu H.Zothangliana chuan kum 1983-a Aizawl Law College din tan atanga a than chhoh zel dan a tarlang a. August ni 25, 1983-ah class kal tanin hemi kum September thla hian khatih laia Chief Minister Brig.T.Sailo chuan a hawng a. Kum 1996-a lo ding Liandingpuia Law College nen July 1, 2004 ah kaihkawp a ni a. August 25, 2006-ah deficit status neiin kum 2013-ah pronvincialised a ni a, a hmingah Govt. Mizoram Law College tih a ni ta a ni. He college atang hian mi 392-in LLB degree an dawng tawh a ni.

Mizoram Law College Building hi December ni 3, 2010 khan sak tan niin December 21, 2014-ah a sak hna hi thawh zawh a ni a. Sum senso ni NLCPR, Ministry of DoNER atanga hmuh niin sum ruahman chu cheng nuai 289.58 a ni a. Mizopa chhiara chhawng 5 niin a chhuat zau zawng hi 1364.86 Sqm a ni.

Hawnna inkhawmah hian H&TE Secretary Pu K.Lal Nghinglova, MZU Vice Chancellor Prof. R.Lalthantluanga, Education Director leh officer dangte, College hrang hrang Principal te, Luangmual khawtlang hruaitute bakah Law College dinna tura bultumtu Pu Zalianthanga leh Pu AV Pakunga te pawh an tel.