Tukin zing dar 9:30 khan Director (Exploration), Ministry of Petroleum & Natural Gas (MoPNG) Pu Nalin Kumar Srivastava leh central sawrkar company (Central Public Sector Enterprises) aiawhten Chief Secretary Pu Lalmalsawma, IAS chu CS Conference Hall-ah an hmu a. Mizorama hma an lak tawhna te an hrilh bakah a theih anga pui turin sawrkar an ngen nghal.
Pu Lalmalsawma chuan sawrkar company aiawha lokal – Oil & Natural Gas Corporation Limited (ONGC), Oil India Limited (OIL) leh Indian Oil Corporation Limited (IOCL) te harsatna chu lo ngaithlain sawrkar chu an hmalakna apianga a puih theih nana telh ve turin a duh thu a sawi a. Director General of Civil Aviation (DGCA) leh Indian Railways hotute hnena an harsatnate chu thlen pui a in huam thu a sawi nghal a ni.
Pu N. Srivastava chuan ram leilung in a zir loh avangin Mizoramah duhthusamin hna an thawh chak theih loh thu a sawi a. Zirchian ngai te zirchian a nih hnuah a aia chak zawka an kal theih a beisei thu leh thla thum danah sawrkar hotute leh company aiawhte in hmukhawm thei se a duh thu a tarlang bawk.
Pu S. Mahapatra, Director (E&D), OIL chuan Keifanga tuialhthei an laih mek chu 3500m-ah 2700m a thuk an lai tawh a, hmun hrang hrang atangin lei sample-te la in an enchhin mek zel tih a sawi a. D. Purakayastha, GGM-Head EXCOM, ONGC pawhin Mizoram hmar Assam leh Manipur te inrina 255 sq. km a zau ah gas an laih chhuah tawh thu sawiin, hlawk tura laih chhuah chi a ni em tih erawh an zirchian mek thu a sawi bawk.
Dipankar Ray, Executive Director (North East), IOCL chuan LPG hnianghnar zawka an sem chhuah theih nan bottling plant thar siam an mamawh a, an neihsa hmunhma in a zir loh avangin Sairangah hmun zawl leh zau tha an zawn mek thu a sawi a. Mipui tam zawkin gas connection nei tawh mahse mamawh hunah leitur mai a awm thin lova, rel in bottling plant thleng a phurh theih hunah chuan heng harsatna te hi sutkian theih an inring a ni.
Inkawmnaah hian Geology & Mineral Resources Department aiawhin Director Pu Lalhmachhuana a tel a. Pu N. Srivastava leh a hote hian nimin tlai khan Chief Minister Pu Lal Thanhawla chu a chenna Bangla-ah an lo hmu tawh a ni.
