3993/2023-2024

Aizawl the 28th February, 2024 : Vawiin khan Information and Public Relations Minister Dr. Vanlalthlana chuan Vanapa Hall Lobby-ah March ni 1, 2024 (Zirtawpni) thleng awh tur  Chapchar Kut 2024 Art and Photo Exhibition a hawng.

He hunah hian I&PR Minister Dr. Vanlalthlana chuan Arts pawimawh zia sawiin, khawvel ram changkang tehna zinga Arts leh Sports te a tel thu a sawi a. Arts leh photography hmasawnna atan I&PR department hmalaknain ruahmanna tha tak tak a awm thin chu lawmawm a tih thu a sawi a. Ram hmasawnna pholan nan Arts chawisan zel a pawimawh thu sawiin, Minister chuan Mizo thlalaite chu national level mai ni lo, international level thleng pha thei tura theihtawp chhuah turin a fuih a ni.

He hun hi I&PR Department Secretary Pi Teresy Vanalhruaii chuan kaihruaiin, Mizoram Art Development Society President leh Mizo Photographers Society President te'n report an pe a. I&PR Director Pu C. Lalnunkima chuan lawmthu sawiin hun a khar a ni.

Chapchar Kut Art & Photo Exhibition ah hian thlalak 120 phochhuah niin, lemziak 75, woodcarve 1 leh sculpture 1 dahchhuah a ni a. Artist te kutchhuak hi a duh tan lei nghal theih a ni.