Vawiin khan I&PR Minister Pu Lal Thanzara chuan Aizawl West II MUP Area 'A' Conference-ah Khuallian niin a hmanpui. 

Vawiina MUP Conference hawnna inkhawm President Pu K. Buangi kaihhruaiah Khuallian Pu Lal Thanzara chuan tlawmngai pawl zahawm leh thianghlim, Mizo nun mawi tlawmngaihnaa innghat pawl chhuanawm, pawl puitling tak MUP Zofaten kan nei hi a lawmawm hle a ni,  a ti. Hnam fing zawka kan ngaih khawthlang ramah te upa ngaihsak hman lova an tu leh faten Old Age Home ah te an dah bo laiin, Mizoramah chuan MUP Unit tin ten mahni Unit member te inngaihven tawn a, intih hlimna hrang hrang an neih thin te hi a hlu a ni, a ti bawk. MUP Member te pawh khawtlang leh ram thil tihah te inkiltawih lovin an tawnhriat te hmanga naupang zawkte finchhuah zel turin a sawm a. Sorkar pawhin kum upate dinhmun hriain tunah hian damdawi inah MUP Member te tan liau liau Cabin 10 sak mek a nih thu leh Semi-Cabin, mi 3 awm theihna pawh siam mek a ni thu Minister chuan a tarlang a, heng cabin te hi ruak mahse midangin an tawmpui theih loh tur thu a sawi a ni. Falkawna Referral Hospital an tlawh duh a nih chuan an senso zawng zawng a tum sak vek tur thu a hrilh bawk. 

Aizawl West MUP Area 'A' Conference-ah hian Aizawl Veng 7 - Vaivakawn, Zotlang, Hunthar, Kanan, Chawnpui, Rangvamual leh Phunchawng atangin MUP member an kal thahnem hle a. Tunah hian an zavaiin member 1197 an awm mek a, tar pension dawng mi 375 leh Inneih Jubilee (Golden & Diamond) lawm thei nupa tuak 6 an awm bawk a. Kum kal ta chhung khan an member 56 boral ta te sunna hun vawiin conference hawnna inkhawmah hman a bawk.