Vawiin khan I&PR Minister Pu Lalruatkima hovin a pisaah I&PR officer-te leh Mizoram Journalist Association hruaitu ten meeting pawimawh tak an nei a. An thu rel zingah hian advertisement rate hman mek ennawn chungchang te, journalist pension chungchang leh training chungchang te a tel. 

Sawrkarin Advertisement rate a hman lai hi kum 2013 a siam a ni a. Thil man sang chho zelah  advertisment rate dinglai hi enhoa tih danglam tul tiin MJA chuan sawrkarah dilna an thlen a. Hei bakah hian working journalist te tana pension neih ve chungchang an dilna pawh sawrkarah thlenin  vawiin meeting-ah hian sawiho nghal a ni. Minister hova meeting chuan pension leh advertisement chungchang zirchianga ruahmanna lo duang turin I&PR Secretary chairman-na hnuaiah committee din ni se tiin a rel.

Journalist leh I&PR officers-te training chungchang pawh meeting-ah hian sawi lan a ni a. Bureau of Parliamentary Studies and Training, New Delhi ah Mizoram sawrkar chuan training turin IPR Department atangin officer panga bakah MJA atangin mi sawmpanga a tir dawn a. Ni 3 awh tur training hi September ni 25 atanga 27 chhungin neih a ni ang. 

Vawiin meeting-ah hian I&PR Secretary Pu Sangdingliana, I&PR Director Pi Lallianpuii leh I&PR Officer dangte bakah MJA President Pu Zonunsanga Khiangte leh a thawhpui MJA OB-te an tel a ni.