Vawiin khan Home Minister Pu Lalchamliana kaihhruaina hnuaia Co-ordination Committee on Traffic Management chu MINECO Conference Hall-ah an thukhawm a. Traffic Jam tihrehna tura Mizoram Bar Association in lehkha an thehluh chungchang leh Aizawl a Traffic jam tihziahawmna atana rawtna hrang hrang te an sawiho a ni.

Home Minister Pu Lalchamliana, Chairman, Co-ordination Committee on Traffic Management ni bawk chuan lirthei intlanchhawk hi traffic jam tihreh nana damna famkim ‘permanent solution’ a ni lova mahse tunah rih chuan kan thil tih theih mitin tana tangkai leh tha niin a lang a ti a. Traffic jam tihrehna tur atana Mizoram bar Association in lehkha an thehluh a, an rawtna te chu tha tiin a theih anga Sawrkar in a bawhzui tur thu a sawi a. Aizawl khawpuia traffic jam tihziaawmna kawnga Traffic, AMC, Transport, UD&PA leh Department dangte  thawh hona tha neih chhunzawm zel a pawimawh thu te, he thilah mipui zirtir leh kaihhruai tun aia chak zawk leh hlawk zawka kalpui a tul thu te, Traffic jam tihziaawm nan lirthei dahna tur parking hmunhma thar siambelh dan kawng dap a tul thu te leh kawng leh kawngsir hman dan felfai zawka ruahman a pawimawh thu te a sawi lang bawk a. Zau takin hemi chungchanga rawtna leh ruahmanna te sawi turin Member te a sawm hnuin rawtna hrang hrang te sawiho a ni.

AMC Mayor Pu P.C. Lalhmingthanga chuan AMC in traffic jam tihziaawm nana hma an lak dante, he thila Local Council te nena tang duna thawh ho an tum dante, tun hnaia traffic jam tihziaawm nana, Taxi stand leh stand dangte, 2252.8 metre lai an tihtlem(paih) thu te leh hmalakna hrang hrang an neih mek te sawiin tun hnaia intlanchhawk dan thar ruahmanna chu tha a tih thu a sawi a. Traffic, Aizawl DC leh Transport Department hotute pawhin hma an lak dan leh rawtna tha nia an hriat te meeting a an sawilan chu zau taka sawiho a ni.

Meeting chuan tunah intlanchhawk dan chu thla khat tal en a nih hnuin thla khat a ral hmain he ruahmanna hi thlirlet tha a ti a. Kawng hman dan leh kawng sir hman dan ruahman zirchianga inkaihhruaina dan duan nise tih leh lirthei tihtlem dan ‘vehicle population control rules’ te duan chhin nise tih rel a ni. Working Group leh Aizawl DC hnuaia road enroachment committee te hmalak tum dan tarlang a ni bawk.

Meeting ah hian intlanchhawk dan thar hman mek in Aizawl khawpuia traffic jam a tihziaawm thu Traffic hotute an tarlang a, AMC hotute pawhin parking area an rin avangin engemaw chen traffic jam tihziaawm thu te an sawi tel bawk a ni. AMC in Melthum ah Bus leh maxi Cab dinna tur hmunhma an buatsaih tan mek thu pawh sawilan a ni a, Truck Terminal Rangvamual ami chuan motor lian a dawl zawh tawh loh vangin a dang siam belh a tul thu te pawh meeting ah hian tarlan a ni bawk.