Vawiin khan Government Champhai College Multipurpose Hall-ah Mizoram Kailawn-2019: Business Plan Contest hmanga Entrepreneurship chawikanna leh inelna buatsaih tur chungchanga  inhrilhhriatna leh zirtirna hun hman a ni a. He hunah hian Entrepreneurship lama tui mi te, Self Help Group, Sumdawnna lama tuimite, NGO aiawh, College Zirlai leh mahni kutkawih thiamna hmanga eizawnna ngelnghet din tumte an tel tha hle a ni.

He hun Planning and Programme Implementation Department, IIM Calcutta leh Mizoram Consultancy Group-te tangkawp buatsaih hi Pu Zoremthara Ralte, SDO Sadar chuan a kaihruai a.  Mizoram sawrkar leh IIM Calcutta-te hmalakna hmanga Entrepreneurship inzirtirna hun leh infuihtharna hun neih a ni chu lawmawm a tih thu a sawi a. Entrepreneurship chu sumdawnna bultanna thar, chona thar hmachhawna  kalphung bik neia awmze nei taka eizawnna siam tuma bultanna a ni, a ti a. Sawrkar hnain mi a daih vek tawh loh avangin mahni thiamna leh theihna hmanga intodelh tum mai bakah khawtlang tana chhawrnahawm leh rawngbaawlsak theitu nih angaih avangin entrepreneurship lam hawia ngaihtuahna sen angai tawh a ni, a ti a. He hun hmang tura kalkhawmte hun tha leh hlawkthlak tak hmanga entrepreneurship hlawhtlinpuitu nih tum theuh turin a chah a ni.

He hunah hian Mizoram Kailawn awmzia  leh  tul hrang hrangte IIM Calcutta-Innovation Park   local partner Mizoram Consultancy Group (MzCG) leh District Master trainer ten zirtirna an pe a. Pu Lalthanpuia, Associate Professor, GCC, District Master Trainer hnen atangin Entrepreneurship awmzia leh hlawhtlinpuitu ni thhei tura pawimawhte ngaihthlak a ni a. Champhai District atanga Mizoram Kailawn; Buisness Plan Contest 2017-2018 finalist a lang Pu Zoramchhana, Champhai Chhungte hnen atangin a tawn hriat leh hlawkpui dante ngaihthalak a ni a. Pi Zorammawii Ralte, Mizoram Consultancy Group (MzCG) in Mizoram Kailawn awmzia leh a dil dan leh tul angte a sawifiah bawk a.  Dr Lallawmkima, DIPRO & Nodal Officer-in lawmthu sawina neiin hun a khar a. Zirtirna hun hman zawh hnu hian zawhna leh chhanna hun neih a ni nghal bawk.

Mizoram Kailawn, 2019 hi June Ni 17 khan Mizoram Sawrkar Chief Secretary Pu Lalnunmawia Chuango, Mizoram State Entrepreneurship Development Monitoring Committee (MEDMOC) Chairman ni bawk chuan Aijal Club-ah a hawng a. Mizoram Kailawn 2019: Business Plan Contest hmanga Entrpreneurs te inlena a tel duhte tan dilna hawn mek zel a ni a. Dilna hi July Ni 17 atanga August Ni 9, 2019 chhungin Online hmangin www.mizoramkailawn.org ah thehluh theih a ni a, diltu zinga beiseiawm leh titha 40 thlanchhuah Finalist-te September Ni 6, 2019 hian puan a ni dawn a. Finalist-te hi IIM Calcutta lama mithiam ten September thla kar thumnaah hian Booth Camp/Training an neih pui ang  a.  September Ni 23, 2019 hian Entreprenuership Summit-2019 neih ani dawn a, Entrepreneur titha thlanchhuahte chuan sawrkar lam atangin eizawnna bultanna tura hamthatna leh pawimawhte an dawng thei dawn a ni.  

 Mizoram State Entrepreneurship Development Monitoring Committee (MEDMOC) hi October Ni 25, 2016 khan a din a ni a. MEDMOC chuan Entrepreneurship lama tui thalaite tan kawng  hawn sak a tum bakah an bul tanna tur thlengin a ngaihtuahsak dawn a ni. MEDMOC hnuaiah hian Entrepreneurship Development Scheme (EDS) kalpui niin Chief Secretary kaihhruaina hnuaiah Planning & Programme Implementation Department, Commerce & Industries Department leh Higher &Technical Department hotute an tel a, Non-official expert member 3 an tel bawk a ni.

MEDMOC thawhpui IIM Calcutta Innovation Park (IIMCIP) hi India rama Management zirna IIM-Calcutta hnuaia awm a ni a. India ram hmun hrang hranga entrepreneurship hmasawnna atana hmalatu ber niin India hmarchhakah pawh nasa takin hma a la mek a, Mizoram University leh tualchhung entrepreneur-te nen kum 4 kalta atang khan hma an lo la ho tawh a ni.  Mizoram Kailawn 2017 leh Mizoram Kailawn 2018 ah diltu mi 620 chuang an awm a, chung zinga mi 83 te chu boot-camp a tel tura thlanchhuah an ni.