Kolasib Bawrhsap Pu Zoengsanga chuan Pu C. Lalfakzuala kum 53 s/o Pu LN Tluanga, Aizawl tlawng lui nghalchawm kaia tla hlum ni a hriat zawngtu te inkhuarna hmun pakhat Hortoki khaw daia tlawng kam chu vawiin khan a tlawh.

Helai hmuna inkhawm tawi buatsaih ah Bawrhsap chuan harsatna leh manganna tawh changin mizo nih a thlamuan thlak a, nu leh pa, thalai rual ten phut let nei hauh lova tlawmngaihna kaltlangin Mizo nunze mawi an lanchhuahtir thin a ni tiin vanduaina tawktu chhungte tan chuan a thlamuan thlak hle dawn ani ati a, heng mizo nunze mawi tak te hi vawng nung rengin midang tan malsawmna nih chhunzawm zel turin kalkhawm te a sawm bawk.

July ni 11, 2019 tlaia tlawng lui nghalchawm kaia tla hlum ni a hriat Pu C. Lalfakzuala kum 53 s/o Pu LN Tluanga, Aizawl chu zawn chhunzawm zel ani a, Kolasib District chhungah hian khawtlang hruaitute kaihhruaina hnuaiah chhunzan zawmin khamrang, hortoki leh bairabi ah te zawn ani a, hortoki a duty te hi lawng (engine boat) pasarih (7) in khamrang lam an pan a, lawng pathum in bairabi lam panin zawn hna an thawk bawk, chutiang bawkin bairabi lam atangin rubber boat hmangin hortoki lam panin an rawn zawng chho a, khamrang lam atangin hortoki pan in a zawng thla ve bawk a ni.

Hortoki VCP Pu H.Lalhruaitluanga chuan a bial (District) mipuite ngaihsak em em tu Bawrhsap Pu Zoengsanga chungah lawmthu sawiin tui tla zawn nana an mamawh chi hrang heng silpauline, light, power supply, petrol ruahmanna kawngah (lawng a hman tur) leh pawisa fai te hmangin Bawrhsap chuan a tanpui tawh thu a tarlang a, he hunah hian Bawrhsap chuan silpauline pahnih leh thingpui lum na tur cheng 2000/- chu khawtlang hruaitute hnenah a hlan bawk.

Bawrhsap Pu Zoengsanga hi Kolasib SDC Pi R.Lalnunkimi leh Kolasib DIPRO Pu Collin Hlychho ten an tawiawm a ni.