Vawiin khan DC Conference Hall, Mamit-ah Fostering Climate Resilient Upland Farming System (FOCUS) hnuaia District Level Co-ordination Committee chu an Chairman Dr. Lalrozama, IAS, District Bawrhsap ni bawk hoin an thukhawm.

Meeting-ah hian District Agricultural Officer, FOCUS hnuaia District Project Manager ni bawk atangin 1st Quarter Progress Report ngaihthlak a ni a. Mamit District chhunga khaw 59-a chhungkua 1814-te hnenah Arhar Seeds (Dal chi khat) Kg 3073 sem chhuah a ni a. Arhar Seeds la sem bang hi a theih ang anga a ching duh turte zawnchhuah a, sem ral turin Committee-ah hian rel a ni a. Khaw 68-a chhungkua 3298 hnenah Kuhva tiak sem a nih tawh thu tarlan a ni bawk.

Vawiin Meeting-ah hian Lead Farmer thlan dan chungchanga an harsatna tawh thin dante sawilan a ni a. Mumal zawka thlanchhuah a nih theih nan FOCUS Manual bu kaltlanga Lead Farmer hi tha tak leh felfai taka thlanchhuah nise tih a ni a. FOCUS hnuaia AH & Vety Sector-ah Vawk vulh tur mi 8 thlan turah Vawk vulh lama hnuhma lo nei tha tawh mi 8 thlanchhuah tawh an nih thu DVO Mamit hnen atangin ngaihthlak a ni bawk.

Meeting-ah hian Community Animal Health Worker (CAHWs) leh Vety Field Assistant (VFAs) te Training dan tur chungchang Report ngaihthlak a ni a. FOCUS leh DRDA-te Convergence hmanga thawhho dan tur sawiho nghal a ni bawk.

Meeting-ah hian FOCUS hnuaia thawktute leh DLCC Committee Members-te an tel tha hle a ni.