3669/2022-2023

Aizawl the 23rd February, 2023 : I&PR Minister Pu Lalruatkima chuan 23.02.2023 (Ningani) zan khan G90’s te buatsaih GIG Motors Veteran Football Tournament hawnna hun Ignite Studio, Khatlaa buatsaih chu Khuallian niin a hmanpui a, Tournament Kick off na hun a hmang nghal a ni.

Khuallian I&PR Minister chuan tournament buatsaihtute chungah lawmthu sawiin football ngainatu hranghlui ten hetiang hun an siam hian footballer mualliam tate leh sulhnu lo nei tha tak tak tawh te min hriatchhuah tir a ni, a ti. Hun harsa tak kara football hlutna lo chawinung tute an fakawm a tih thu Minister chuan a sawi a. Football ngainatute hnukhnai tu hmanraw tangkai tak ni tura G90’s lo ding chu a lawmawm takzet a ni, a ti bawk. Pu Lalruatkima chuan Mizo te hian football kan ngaina hle a, footballer zingah Pathian rawngbawl tute, sawrkar lam thleng pawha hna sang tak thawkte pawh an awm nual te hi a lawmawm a, hun kal ta te thlir chuan tun dinhmun kan thlen theihna atana kan mi hmasa te hmalakna a ropui takzet a ni, a ti.

Minister chuan Football chauh ni lo, infiamna lamah sawrkar pawhin theih tawp a chhuah thu a sawi a, thalai ten sual kawng an zawhna lak ata hruai chhuak thei tu hmanraw tangkai leh pawimawh tak chu infiamna lama hmasawn a ni, a ti. Infiamna a ni emaw kan ram hmasawnna tur atan chuan chhiatna lai in hmuh sak ringawt lam ni lovin kan thatna lai hi inhmuhsakin, hmasawnna kawng kan zawh theihna turin infuih phur leh kan thatna lai zel insawisak a that thu a sawi a, midang tana malsawmna ni thei turin mitin hian midang te tiphur thei zawngin hma i la ang u, tiin Minister Pu Lalruatkima chuan mipuite a sawm a ni.

He hunah hian Khualzahawm Pu John Lalpeka chuan ruihlo laka Mizo te kan fihlim a ngaih thu te, infiammite tan thawhrim a tul thu leh ram tana theih tawp chhuah a ngaih thu a sawi a. Sawrkar chuan theih tawpin infiammite pui thin a, amaherawhchu, hlawhtling tak tak tur chuan sawrkar puihna chauha innghat lovin mahniin tum ruhna kan neih a tul a ni, a ti.

He Veteran Football tournament ah hian team 21 an tel a, tie draw neih nghal a ni bawk.