3668/2022-2023
Ramtuk thla ni 23, 2023: Lawngtlai Bawrhsap Pu David Lalthantluanga chuan February ni 21, 2023 (Thawhlehni) khan India leh Myanmar insumdawn tawnna tur, Kaladan Multi Modal Transit Transport Project (KMMTTP) kawngpui sial mek chu Lawngtlai khawpui atanga District chhim lam ramri, Land Custom Station (LCS) sakna tur hmun, Zorinpui thleng zawhin, kawngpui sial mek dinhmun a enfiah.

Lawngtlai Bawrhsap Pu David Lalthantluanga hi Additional Deputy Commissioner Pu Abraham Beirazi Khithie chuan tawiawmin, kawng enkawltu PWD Multi Modal Project Sub-Division-II SDO Er H. Malsawmtluanga leh thawktu dangte'n kawng sial hna thawh mek dinhmun leh hmabakte enpuiin an hrilhfiah a ni.

Lawngtlai Bawrhsap hian Zorinpuia insumdawn tawnna hmun tur leh Myanmar ram chhunga KMMTTP zawmpui kawngpui sial mek dinhmun te pawh en nghalin, hna chak zawka thawh a nih theih nana District Administration atanga hma lakna tur te sawi ho nghal a ni a. NH-502A (Zorinpui - Longmasu) double lane-a kawngpui sial hna thawh tur pawh a en nghal bakah, Zochachhuaha Assam Rifles hmun pawh tlawhin, Assam Rifles hotute nen ramria venhimna kalpui dan leh thil tul hrang hrang an sawi ho bawk a ni.