No.3342/2021-2022

Aizawl 9th December, 2021 : I&PR Minister Pu Lalruatkima chuan vawiin chawhnu khan Khuangleng HSS din thar hawnna hun Khuangleng Community Hall-a neih chu Khuallian ni a hmanpuiin a hawng. Minister hi East Tuipui bialtu MLA Pu Ramthanmawia, Bamboo Link Road Board Vice Chairman chuan Khualzahawm niin a tawiawm a ni.

Khuallian Pu Lalruatkima chuan tun hma mi hmingtha tak takte lo chhuahna Tuipuiralah zirna kawnga tanlak thar a tul thu sawiin, Sawrkar fawng chelhtu Officer lian zingah Mizote kan awm theih nan zirna kawngah tanlak thar a tul hle a ni, a ti a. Eng hna pawh eizawnna ngelnghet atana hmang turin lehkha zir a ngaih thu a sawi a. Rinawmna leh dikna vawnga khawtlang nun siam that leh thangtharte zingah zonun zemawi aia upa zah, tlawmngaihna leh a dangte zirtir uar a tul thu sawiin, nu leh pate chu fate thanlen zelna tur kawngah hmangaihna nen nun kawngdik kawhhmuh kawngah tan la thar leh turin a chah a. Khawvel changkang zel leh inelna nasa tak kara dam khawchhuak tur chuan zirna chu chawisanga, khawtlanga hmun lailum luahtir a tul thu sawiin, Pathianin Missionary-te kaltlanga Mizote zirna min pe hi kan vanneihna a ni, a ti. Zirna in tawpchin a neih loh thu leh damchhunga inzirthar reng tur kan nih thu sawiin, YMA in zirna uar kum a puan leh thupuia a neih thin chu theihtawp chhuaha zawm a tul thu a sawi bawk.

I&PR Minister chuan Zirlaite chu lehkhabu chhiar uar thar tur leh chin tawk neia social media hmang thiam tura fuihin, thu dik ziktluaklo leh thu lengvak nazawng awihlo turin a chah a. Hnazahawm tak thawktu Zirtirtute chu naupangte tana entawntlak leh Zirtirtu tha nih tum fo turin a fuih bawk a. Sawrkarin RMSA HSS Mizoram puma pahthum a hawn thar zinga pakhat Khuanglengin a chang thei chu a lawmpui thu sawiin, bialtu MLA leh mipuite hmalakna fakawm a ti a. Sawkarin Khuangleng HSS Building sa tura ruahmanna a neih mek thu sawiin, zirna in hawn thar chuan zirna kawnga Khuangleng mai bakah zoram pumah harhtharna a thlen ngei theih beiseiin an kalzelna tur atan duhsakna hlanin a hawng a, School mamawh leina tur pawisa a hlan bawk.

Khualzahawm Pu Ramthanmawia chuan East Tuipui bial chu zirna kawnga theihna nasa tak nei a nih thu sawiin, hmun dang amite aia an hnuaihnung bik loh avangin midangte el pha thei an nih hriaa theihtawp chhuah turin Zirlai leh Zirtirtute a chah a. A bial chhungah Zirlai tithate lawmpuina pek an nih thin thu sawiin, kumin HSLC leh HSSLC Exam Distinction a pass 15 te hnenah MLA Award Laptop pek an nih thute, kum 2019 atanga vawiin ni thlengin a bialah Zirtirtu hrang hrang 99 pek belh a nih thu leh, Middle School Headmaster 6 dah an nih sawiin, sawrkarin zirna a ngaipawimawh a theihtawp a chhuah zel dawn a ni a ti. Khuangleng HSS thar lawmpui nan Computer set leh Printer a hlan nghal bawk a ni.

Khuangleng HSS hawnna hun Community Hall-a neih hi Pi Laltlansangi, VCP Khuangleng chuan a kaihhruai a. Pu Omeg K. Zoliana, Principal, Khuangleng HSS in School report a pe a. Pu T.T Laltanpuia, DEO Champhai leh Pu T. Nghakliana, VCM Khuangleng te hnen atangin thusawi ngaihthlak a ni bawk a. Pu TC Thangpuia, VCM Khuanglengin lawmthu sawiin hun a khar a ni.

Khuangleng HSS hi Samagra Shikha Project Approval Board (PAB) in May ni 29, 2020 khan din rem tiin a pawm a, May ni 4, 2021 atang khan Official-a School kalpui tan a ni. Tun dinhmunah hian Khuangleng HSS ah hian Zirtirtu 6 leh Zirlai 39 an awm mek a. English, Mizo, Political Science, History, Sociology leh Education subject-te zirna hawn a ni a. School atan Khuangleng Multi-purpose House luah lailawk a ni a, School ram tur Site Survey neih fel tawh a ni.