282/2023-2024

Vawiin khan Information and Public Relations Minister leh Aizawl West II Bialtu MLA ni bawk Pu Lalruatkima'n K.M High School zirlai leh zirtirtu te tlawhna hun a hmang.

Minister Pu Lalruatkima chuan thu sawiin tun hma atangin KM High School atanga zirchhuak, ram pum huapa mi chhuanawm tak tak leh Zoram ti hming tha tu an lo awm teuh tawh a, KM High School hi Aizawl tlak lam ti mawi tu vawiin ni thlengin a ni a ti a. Minister chuan Kum 1986 khan KM High School ah Career Guidance buatsaih niin, camping te buatsaih a lo nih tawh thu leh amah ngei pawhin heng a chhim thu sawiin, vawiin ni dinhmun a thlen theih chhan pawh a ni tih a sawi a.

Minister Pu Lalruatkima chuan School Building chungchang sawiin, Project siam a tha lawm ni tiin, ngaihtuahna kan neih laiin, Covid in min hnan a, hun rei tak hnathawh tur ang thawk theilo in kan awm a, tun hnaiah Article 275 tlawh chhanin hmasawnna chi hrang hrang thlir a nih thu a sawi a, chung zingah chuan KM High School Building sakna tur bawhzui a nih tur thu a sawi a ni. Tun hnaiah Vaivakawn High School leh Tuikual North High School tih changtlunna leh thawm thatna tur cheng nuai 70 leh cheng nuai 60 ve ve hmuh a nih thu a sawi a. MLA Fund atangin Govt. Aizawl West College-ah Smart Classroom siam a nih thu te a sawi bawk a ni.

Minister chuan School tha tehna pakhat chu result ni mah se, tehna dang matric result bakah zirlaite kal zelna turah hian, eng kawngah pawh ni se mi puitling ram tana mi chhenfakawm engzatnge chhuak tih hi chhut fo a tha a tih thu a sawi a. Zirtirtu ten theihtawp an chhuahna chu zirlai ten taimakna, tumruhna in an chhang let tur a ni a ti a. Hma lam hun hria kan awm lo a, amaherawhchu tum neiturin Minister chuan zirlaite chu a fuih a. An tum a hlawhtlin nan chuan thil tamtakah a hmasa ber an nih a ngaih thu te, a chang chuan a hnungdawl tu an nih pawh a ngaih thu te sawiin, hlawhtling tur chuan midang aia pen hnem, thawh hnem zir hnem leh inpekna a keng tel a ni a ti. Khawvela mi hlawhtling tur chuan huaisen a ngai bawk tih hrereng turin zirlaite a chah a. Khawvel changkanna kal zelah hian a thei thei dinchhuahna khawvel a ni tih hre reng turin leh mi te theihna leh thiamna chawimawi a, midang fak phu te fak mai hi lehkhathiam zia a ni a ti a. Kan hnam tan, kan dinchhuahna atan kan hmathlir chu zirlaite in ni tiin a sawi. Nihna tur kan nih theihlohnana thil dang tul lo zawng zawng paihthla ngam turin leh social media hmang thiam a, thu dik lo leng vel laka fimkhur turin zirlaite chu a chahin, ram tana fahrin man hla ni turin duhsakna a hlan a ni.

He hunah Senior Teacher Pi Lalkhumtiri chuan Minister hnena lawmthu sawina neiin, Bialtu MLA Pu Lalruatkima chu school in harsatna leh indaihlohna a tawh lai pawh a ngaihsak rengtu MLA a ni thu a sawi a. SEDP atangin, Maths zirtirtu, LDC, 4th Grade Chowkidar pek an nih avangin lawmthu a sawi a ni.

Minister hi Dawrpui Vengthar Local Council Chairman Pu Robert Zosanglian'an a tawiawm a ni.

K.M High School- ah hian tun dinhmunah zirlai 271, zirtirtu 15 leh staff engemaw zat nan awm a.