Vawiin chawhnu khan  I&PR Minister Pu Lalruatkima chuan CYMA Conference Hall-ah  Zirtirtu Ni,  Mizo Zirlai Pawl, General Headquarters ten an huaihawt chu Khuallian niin hmanpuia. He hunah hian India ram pum huap leh Mizoram pum huapa Zirtirtu, hnathawk tha chawimawina dawngte hnenah chawimawina hlan a ni.

Zirtirtu Ni leh Zirtirtu Tha chawimawina hunah hian I&PR Minister Pu Lalruatkima chuan hmasawnna kawngah khawvel kan intlan siak mek a. He intlansiaknaa tel tur hian thiamna kan neih a ngai a. Thiamna min petu chu kan zirtirtute an ni a. Chuvangin, Zirtirtu te  zah leh chawimawi hi kan tihtur dik tak a ni a, ram leh Hnam dintu tia an sawi thin pawh hi thilawm tak a ni a ti. Eng ang hna pawimawh emaw hna te zawk te pawh a niang, thawk nimahila zirtirtute hlutna hriat leh zahthiam hi mitin ten a bata kan bat a ni a ti a. Mizoramah kumtin zirtirtu tha chawimawitur kan nei thei hi a vanneihthlak a, a chhuanawm hle a ni. Zirtitute pawhin an pawimawhna te, an hna in mawhphurhna a ken tel te an hriatchian hle a ngai a. Naupangin zirtirtute nundan an lachhawng duh hle tih kan hre veka. Chuvangin zahawm taka nun leh mahni invawn uluk kawngah pawh zirtirtu hnathawk chu entawn takin a nung tur a ni a ti a. Zirtirna kawngah pawh, naupangin kan zirtirna an dawngsawng tha em tih te leh an hriatthiam zawngin kan zirtir em tih te pawh inennawn ve thin a pawimawh hle a ni a tih a sawi a. Zirtirtute zingah inelna thianghlim; Chhawrtlak mithiam rual chherchhuah, khawtlang leh ram leh hnam tana mi tangkai bakah mi puitling chherchhuah kawnga inelna te lo awm se, kan zavaiin tun ai hian hma kan sawn nasa zawk dawn a ni a ti.

Thusawitu dang, MZP President Pu L Ramdinliana Renthlei chuan zirlaite aiawhin zirtirtute zawng zawng chungah lawmthu a sawi a. Ram leh hnam tan mithiam  tam zawk chherchhuahna kawngah nasa leh zuala tan an lak zel theihna turin duhsakna a hlan a. Zirtirtu tha chawimawina chu MZP in a lo nei ziah thina, neih chhunzawm zel pawh a tum a ni a ti.

Vawiina MZP huaihawt, Zirtirtute Ni(Teachers' Day) Vawi-57-na Lawmna Programme hi Pu B. Vanlaltana, Vice President, MZP chuan a kaihruaia. He hunah hian MZP chuan Zirtirtu tha, State Teachers' Award dawng mi 5 leh National Teachers' Award  dawngtu mi 2 hnenah chawimawina an hlan a. A hnuaia mi te hnenah hian MZP in Zirtirtu tha te a lawmpuina chu Khuallian I&PR Minister Pu Lalruatkima chuan a hlan a ni.

National Teachers' Award dawngtute: Pu GS Zaithantluanga, Govt. Diakkawn High School, Kolasib  leh Pu Jayanta Nath Maji,  tuna Delhi-a lawmman President of India hnen atanga dawng tura thang mek, Headmaster, Govt Keifang High School, Keifang.  State Teachers Award dawngtute : Pu GS Zaithantluanga, Govt. Diakkawn High School, Kolasib, Pu H. Lalrinchhana, Headmaster, Govt Tlungvel Primary School II, Tlungvel, Pu Lalpiangthara, Headmaster, Govt Chaltlang Middle School, Aizawl, Pu Rosiamhnuna, Headmaster, Govt Chaltlang High School, Aizawl, Pu Lalchhuanmawia, Hindi Teacher, Govt Zemabawk, Middle School leh Pi Rochami, Headmistress, Rev Thianga Primary School, Bethlehem Vengthlang.