Ramchhung hmun dangte rualin vawiin khan Champhai District-ah Zirtirtute Ni vawi 58-na chu Sikul hrang hrang ten an lawm a. District Level Teachers’ Day Celebration Committee-in a lo rel tawh bawhzuiin  ruat bik ten Zirna In hrang hrangah kalin he hun hi an hmanpui a. Pu Alexander V.Chongthu, Addl DC Champhai chuan Presbyterian English School (PES) Champhai Vengthlangah he hun hi khuallian niin a hmanpui a, Dr. Lallawmkima  DIPRO in  a  tawiawm a ni. 

Pu Alexander V. Chongthu chuan  chuan Zirtirtute Ni pualin District chhunga Zirtirtute zawng zawngte chibai a buk a. PES Champhai Vengthlanga Zirtirtute puala ni pawimawh tak hmang tura  District Level Teachers’ Day Celebration Committee-in a ruat chu nihlawh a in tih thu a sawi a. Zirna In tha tak, a chhunga Zirtirtu  thahnemngai leh Zirlai naupang duhawm tak tak awmte zinga ni pawimawh tak a hmang thei lawmawm a tih thu sawiin, Zirlaite chu anmahni kaihruaitu Zirtirtute zah tur leh an thusawite uluk taka ngaithla thin turin a fuih a. Zirlai naupngte chu Zirtirtute thawhrimna   hre renga,  hlawhtlinna duhawm tak hmanga chhangleta chawimawi tum turin a chah  a.  Zirlai leh Zirtirtute chu Teachers’ Day hlimawm tak hmang tura duhsakna hlanin, Sikul kalzelna turah duhsakna a hlan bawk a ni.

He hunah hian Pi Zairemtluangi Khiangte, Principal, PES Champhai Vengthlang pawhin thusawiin,  Zirlaite hmakhua ngaia theihtawp chhuah thintu Zirtirtute chungah lawmthu a sawi a. Sikul atanga zirchhuak naupangten an kalzelna kawngah hlawhtlinna an chang em tih leh khawtlang leh kohhran tan chhawrnahawm an ni em tih chu an thlithlai zui reng thin tih sawiin, Zirlaite hlawhtlinna   chan chu an lawmna ber anih thu a sawi bawk.

He hun PES Sikul tualzawla hman hi Lalramtharzuala, Treasurer, Students Council leh Sarah Lalmuanpuii, Asst. Secretary, Students Council-te chuan an kaihruai a.  Zirlai Lalmawizuali, Class VII  in  Teachers’ Day puala Education Minister thuchah a chhiarchhuak a. Vanlalmalsawmi, Class VIII-in Dr.Sarvepalli Radhakrishnan a chanchin tlangpui a chhiarchhuak bawk. Vawiin Teachers’ Day pual hian Zirlai naupangten Zai, Lam, Chang sawi, Lemchan leh thiam thil dang benglut tak takte an chhawpchhuak a. Hun hman zawh hnu hian Zirtirtuten District Hospital-ah a mamawh apiangte hman theih turin thisen an pe a ni. PES Champhai Venngthlang  hi  kum 1996 a din a ni a, KG I atanga Class VII thlenga zirna awmin, tun dinhmunah Zirlai 476 leh thawktu 19 an awm mek a ni.