No.6901/2020-2021

Vawiin hian Pu Lalruatkima, Minister, I&PR, RD, Revenue, etc., chuan Serchhip Press Club, Serchhip Field Road a sak chu a hawng.

A hawnna inkhawm buatsaihah Pu Lalruatkima chuan, ram mipuite kaihruaitu tangkai chanchinbumite tana hmun pawimawh Press Club thar Serchhipa a puitling ta chu lawmawm a tih thu a sawi a. He Club a puitlin theih nana thilpek petute inphalna te an fakawn tak zet a ni, a ti a. Press Club thar lawmna pual liau liau hian Serchhip District a Newspapers zawng zawngte Display Advertisement kan pe dawn cheu a ni  a ti. Minister chuan, Serchhip DIPRO Office pawh hun rei tak sanction post awm lovin Directorate atanga Attached maiin a lo awm tawh a, nimahsela kumin atang chuan district office puitlingah sawrkar chuan kan dah chho ta a, hma a sawn chhoh zel nan kan umzui zel dawn a ni, a ti bawk. Journalist te tana sawrkarin hamthatna a duan mekte tarlangin Minister chuan Journalist Welfare Fund te tha taka kalpui a ni a tun hnai maiah Press Tour vawi nga zet buatsaih niin Journalist Pension Scheme pawh duan mek a ni a ti. Mizoram journalist te chu State dang journalist te tih ang ti ve thei leh pawl phaka a beisei thin thu sawiin Mizoram leh mipuite zau zawka pho chhuah lama tan lak zel a tul hlea a hmuh thu a sawi a. Thlei bik leh awn lam nei lova thuthar thehdarh thin, zahawm leh inthununna tha tak nei mi ni tura a beisei thin thu a tarlang bawk.  Mipuite tibengvartu leh zirtirtu an nih avangin inpe zo taka an hna an thawh chuan ramin a hlawkpui thin tih a hrilh a, sawrkar policy puanzar kawngah pawh anni tel lo chuan engmah a tih theih meuh lova, in pawimawh em em a ni, a ti. Tuna covid19 dona kawnga journalist hote thawhhlawk zia pawh ram mipuiten chiang takin kan hmu a ni, a ti. Pu Lalruatkima chuan, zo nun ze mawi inzirtirna lam te, Social mediaa thu chiangkuang lo mipuite rilru tibuai thei laka invenna lam te leh nun kawng dik inzirtirna lam te uar deuh deuh a tul nia a hriat thu a sawi a ni. 

Minister hian kal khawmte chu Krismas leh kumthar lo thleng tur chibai a buk a, Serchhip MJA hnenah thilpek a hlan bawk a ni.

A hawnna inkhawm hi Pu C. Ramengmawia, Vice President, MJA, Serchhip in a kaihruaia, Rev. B. Lalengzauva'n hunserh a hmang a, Pu Kapliana Pachuau, President, MJA, Serchhip in kalkawmte lawmna thu a sawi a ni. Pu Kapliana Pachuau chuan,  Press Club a puitlin theih nana sum leh pai leh thilpek petute chungah lawmthu a sawi a, Press Club chu MJA te tan chauhva siam a ni lova Serchhip mipuite tan zawk a ni a, a duh apiangten man tlawm taka an hman theih nan ruahmanna fel tak siam a ni, a ti a. I&PR Minister in an sawmna te ngai pawimawha a hawn sak thei chu an lawm hle tih a tarlang bawk. 

Technical Report hi Pu Biakchamliana, Gen. Secretary, MJA, Serchhip in a pe a. Press Club sak nan hian kum 2018 khan Pu Lal Thanhawla, khatihlaia bialtu MLA leh Chief Minister zahawm tak ni bawk chuan NEDP atangin Rs. 10 lakh a pe a, a hnuah Pu Ronald Sapa Tlau, khatihlaia MP, RS chuan a Fund atangin Rs. 2 lakh a pe bawk a. Chung sum te bakah anmahni duhsaktu mi hrang hrangte hnen atanga thilpek an dawn te nen, he Press Club hi floor pakhat luah theihin an peih a, chu chu vawiinah Minister hian a hawng thei ta a ni. A building hi a dung 40 mtrs leh a vang lam 60 mtrs leh chhawng nga a sang niin Er. ZD Laltlanzova'n a design a ni.

Serchhip Press Club hawnnaah hian Pu Zonunsanga Khiangte, President, MJA General Headquarters pawhin thusawina hun a hmanga, Press Club thar lawmna thilpek a hlan bawk a ni.

Minister hi Pu C. Lalnunkima, MIS, Jt. Director, I&PR, Pu Andrew H. Lalremruata, MIS, IPRO leh official pawimawh dangten an rawn tawiawm a. Pu. R Sathiyasundaram, IPS, SP Serchhip, Pu Malsawmtluanga, MCS, PD, Serchhip leh Head of Offices leh official sawm bikte, tlawmngaipawl leh mi pawimawh dangten he hun hi an telpui a ni.