Vawiin chawhma khan Information & Public Relations Minister Pu Lalruatkima chuan Kawnpui Market Building, Kawnpui Vengtharah  Mizoram Rural Bank, Kawnpui Branch building thar a hawng a. He hunah hian Bialtu MLA Pu Andrew H. Thangliana leh MRB Head Office lama hotute pawh an tel a ni.

Kawnpuia Bank building thar hawngtu I&PR Minister Pu Lalruakima chuan ram hmasawnna avang leh sawrkar hmalak dan changkang zelah Bank hlutna a pung a. A tel lovin sawrkar hmalakna tihhlawhtlin pawh a har tawha; Ram hmasawnna ruhrel pawimawh tak pakhat a ni tawh a ni a ti.

Mipuite leh Bank mawhphurhna te tarlangin mipui atanga hlawkna Bank-in a tel thin ang bawkin Mipui hnenah sum chu  Loan ang tein a luanchhuah ve a ngai a. Hemi kawngah hian MRB chu Nationalised Bank  tam tak, Mizorama lo lut mek ten an entawn tlak khawpa thawk tha a nih thu a sawi a. Bank in mawhphurhna a neih ang bawkin Loan puktute pawhin tha taka Loan rulh let chu an tih makmawh a ni a. Hemi kawngah hian Mizo mipui zinga Loan puktu ten hmasawnna tur kan la nei a ni a ti.

Sum enkawl kawngah Mizo mipuiten hma kan sawn chho zela, Bank kan thlir dan pawh pawisa dah himna leh a pung awma dahna ringawt a ni tawh lova. Tangkaina tam tak Bank in a nei tih kan hre tawh a ni a ti a. "Thawk leh khatna sum pung thut um hi kan chet chhiatna thin a ni a, kan sim a ngai a. Pathian thua kan hmuh angin rim taka thawka, hmaia thlan tui luang zawih zawiha ei hmu tur kan ni. Taima taka thawka hlawhtlin tum hi kawngdik kan inkawhhmuh thar leh ngai a ni", a ti.

Tunlaiah sawrkar hmalakna zawng zawngah Direct Benefit Transfer(DBT) kalpui a nih tawh avangin Bank tel lova hnathawh a theih tawh meuh lo a ni a ti a. Bank zingah pawh Thingtlang kilkhawr ber thlenga inzarpharh te bakah Customer te hnena Loan pe chhuak phal te  chu Sawrkarin Bank thenkhat te aiin a thawhpui a ngai zawk thin tih a sawilang bawk a ni.

Turial AC bialtu MLA Pu Andrew H. Thangliana pawhin bial mipuite tan dawr awlsam zawka Bank building thar hawn a ni ta chu lawmawm a tih thu a sawi a. MRB chu bank dawr nuam tak ni chhunzawm zel tura duhsakna a hlan rualin Mizorama inzarpharh ber an nihna ang erawh chuan Automatted Teller Machine( ATM) siam an hmabak tih a sawi a. Thingtlang mipuite awlsam zawka pawisa an lakchhuah theih nan ATM bun kawngah hma la turin MRB hotute chu a ngen a ni.

MRB, Kawnpui Branch-ah hian Account 12,000 bawr  vel hawn a ni a. Hei hi Customer awmzat ai chuan a tam zawka ngaih a ni a. Kawnpui khua bakah Zanlawn, Hortoki, Mualkhang, Bualpui leh Khamrang khua ten he Bank hi an dawr mek a. Kawnpui MRB hian tun dinhmunah Deposit Rs 38 Crore bawr vela chawhrualin an nei thin a ni.  Mizoram pumah MRB chuan Branch 85 an nei mek a; kumin Financial Year chhungin Branch 5 hawn belh leh an tuma, thawktu 420 an nei mek bawk a ni. MRB share zinga za zela Sawm Panga hi Mizoram Sawrkar ta a ni a, za zela Sawmnga chu Central Sawrkar ta a ni thung a. Tichuan,  MRB share za zela Sawmruk Panga chu Sawrkar ta a ni.

MRB, Kawnpui Branch hawnna Programme hi Pu Lalduhawma, Chief Manager(Advances) in a kaihruaia. Report leh thusawi  Pu Amal Chandra Sarkar, GM-I eh Pu Lalngilneia, Chief Manager(NPA) te hnen atangin ngaihthlak a ni bawk a ni.